Giovanni Gioviano Pontano hendecasyllabi 1, 32

Reference basis text: B. Soldati, 1902

Editing of the digital edition: M. Montalto


32. de Alfonsi ducis Calabriae
et Albini munusculis

Nolo caseolos ducis tenacis;

Vani caseoli ducis, valete;

Ducis caseolos nihil moramur;

Ducis caseoli, valete, abite:

5

Albini volo dona liberalis.

Albinus mihi carduos sicanos,

Albinus mihi salsulas olivas,

Albinus mihi mella succarumque,

Quin et fasciculos dedit rosarum;

10

Promisit quoque cyprios odores,

Missurus quoque myrteos liquores.

Vani caseoli ducis, valete;

Nil iam caseolos ducis moramur:

Albini volo dona liberalis.

15

Albinum faciles ament puellae,

Albino faveat Venusque Amorque.

Alfonsum tetricae doment puellae,

Alfonso noceat Venusque Amorque,

Sint et Drusula Drusulaeque ocelli

20

Irati nimis atque saevientes;

Et cepas simul alliumque ructet,

Siquando ad thalamum vocabit illum,

Professus dare, qui mihi recusat,

Paucos caseolos, inane donum.