29. de Marulli munusculis
Misit caseolos mihi Marullus,
Cumque his versiculos venustiores,
Quales maenaliae canunt puellae
Vna cum gelido lavantur amne,
5
Quales aoniae canunt sorores
Cum laetas agitant simul choreas.
Par est versiculis referre versus:
Quid pro caseolis referre par est?
Oranda est mihi blanda Septimilla,
10
Vt pro caseolis velit referre
Centum basiola et catulliana,
Centum suaviola atque lesbiana.