Giovanni Gioviano Pontano de tumulis 1, 38

Testo base di riferimento: B. Soldati, 1902

Cura dell'edizione digitale: M. Montalto


Tumulus Phiellae matronae pauperculae,
tamen pudicissimae

Auratis digna es loculis, formosa Phiella:

      Heu te condit humus, vilis et haerba tegit.

Heu heu, nec mater, nec te tua pignora deflent;

      Nulla tibi est mater, pignora nulla tibi,

5

Non frater, non cognato de sanguine quisquam,

      Non pater ipse aut quae lac tibi mamma dedit.

Vos, fusi, deflete, coli, deflete Phiellam,

      Flete et eam, lanae, flete et eam, calathi,

Flete et, acus, et fila fleant et lina Phiellam

10

      Telaque. Vix tumulo, casta puella, iaces,

Casta puella, lates tumulo vix, vix tibi cespes

      Dat tumulum, vix te terra inarata tegit;

Quae tamen haerba tegit, nullos haec sentiat aestus,

      Frigora nulla, tuo floreat usque solo.