7. ymnus cum simplici cantu pro die minuitionis
1
Sanguis demptus
Et redemptus
Nos servet in letitia,
Qua optetur
Et prestetur
Eterna celi gloria.
2
Cruor fusus
Prestet usus
Recogitande gratie,
Quam dedisti
Cruce Christi,
Summe Deus clementie.
3
Ictus vene
Prius plene
Nos excitet interius,
Ad hoc clamat
Qui nos sanat
Ales diei nuntius.
4
Cesa fibra,
Homo, libra
Agni cruenta vulnera,
Si dolebis,
Possidebis
Eterna Christi munera.
5
Recolamus,
Dum pausamus,
Post levem haustum sanguinis,
Quantum cesus
Fuit Ihesus
Consors paterni luminis.
6
Demptis venis
Nimis plenis,
Mundetur mens medullitus,
Vt clamemus
Et cantemus:
"Veni, creator Spiritus".
7
Ne impugnet
Vel expugnet
Nos veteranus proditor,
Nos minutos
Fac imbutos,
Immense celi conditor.
8
Arteriis
Datis viis
Pro corporis potentia,
Meditemur
Et lucremur
Eterna nobis gaudia.