12. epitaphium Federici Benteuolei fratris

Pierii frater saxo Federicus eodem

      Clauditur: heu fato raptus uterque pari est.

Fratre minor fuerat, uirtute atque artibus idem,

      Atque idem morbus finis utrique fuit.

5

Occupat hunc febris post fratrem luce sequenti,

      Et decima fratrem luce secutus obit.

Principis heu qualis luctus maerorque parentum!

      Praeteriit siccis funera nemo genis.

Ast uelut hac illi concordes luce fuerunt,

10

      Sic nunc unanimes sidera clara tenent.

Corporibusque uelut terra requiescit uterque,

      Sic animis caelos sanctus uterque colit.