13. ad Pisanum pictorem statuariumque,
antiquis comparandum
Quis Pisane tuum merito celebrabit honore
Ingenium praestans artificesque manus?
Nam neque par Zeuxis, nec par tibi magnus Apelles
Sive velis hominem pingere sive feram.
5
Quid volucres vivas, aut quid latentia narrem
Flumina, cumque suis aequora littoribus?
Illic et videor fluctus audire sonanteis
Turbaque coeruleam squammea findit aquam.
Perspicuos molli circumdas margine fonteis,
10
Mistaque odoratis floribus herba viret.
Per nemora et saltus nymphae venantur apertos
Retiaque et pharetras et sua tela gerunt.
9a
Garrula limoso sub gurgite rana coaxat,
10a
Valle sues; ursos monte latere facis.
11a
Tum liquidos molli circumdas margine fontes,
12a
Mixtaque odoratis floribus herba viret.
12b
Vmbrosis nymphas sylvis errare videmus,
12c
Haec humero casses, altera tela gerit.
Parte alia capreas lustris excire videntur,
Et fera latranteis rostra movere canes.
15
Illic exitio leporis celer imminet imber,
Illic fremit insultans, frenaque mandit equus.
Nare lacu ranas, silvis errare leones,
Ima valle truces ire videmus apros.
Se profert antro catulis comitantibus ursa,
20
Martius ad plenum tendit ovile lupus.
Quis non miretur gestusque et sancta virorum
Corpora? quae penitus vivere nemo neget?
Quisve Iovis faciem pictam non pronus adoret,
Effigiem veri numinis esse ratus?
25
Denique quicquid agis, naturae iura potentis
Aequas divini viribus ingenii.
Nec solum miro pingendi excellis honore,
27a
Illustris nec te tantum pictura decorat.
Nec titulos virtus haec dedit una tibi.
Sed polycleteas arteis ac Mentora vincis;
30
Cedit Lysippus, Phidiacusque labor.
Haec propter toto partum tibi nomen in orbe,
Te praesens aetas, posteritasque canet.
32a
Et meritas laudes candida fama canit.
32b
Sis felix longum Lachesis te servet in aevum
32c
Et nostram, si qua est, dilige Calliopem
Ast opere insigni nostros effingere vultus
Quoc cupis, haud parva est gratia habenda tibi.
35
Si longos aliter mea non exibit in annos,
At saltem vivet munere fama tuo.