Epithalamion Iacobi de Pirandulis et filiae Iohannis Aromei compositum per Malatestam de Areostis

Solvite Pierides vestro de fonte liquores,

      Quo fluat exigua rivulus uber aqua:

Et leonellei fontis dea candida Clio,

      Rore tuo nostras sparge benigna comas.

5

Ingrediar vates post haec tua templa secundus:

      Teque meis olim concelebrabo modis.

Iam cape Phoebe lyram: primaque ab origine pande

      Connubium: ipse tuos subsequar arte sonos.

Ante novas mundi formas rex magnus Olympi

10

      Antiquum fertur incoluisse chaos.

Et postquam igniferos divisit ab aequore caelos

      Et stetit aereis terra relicta plagis,

Dicitur in varias animalia facta figuras

      Atque hominem certo constituisse loco.

15

Hunc cecinere sacri patres terrestria Tempe

      Tunc ubi composuit vincula sancta tori.

Inde hominum coepit proles succrescere terris

      Fidaque cum fido vivere sponsa viro.

Cum patribus pueri votumque munus ad aras,

20

      Cum matre et didicit filia ferre favos.

Ante Iovem fueras felix deus ille deorum

      Cum stabas rudibus cinctus imaginibus.

Quisque es ille deus nostris cape thura choreis,

      Dum fumosa tuos circuit urna focos.

25

Festum hymnis moveo: festum celebrate puellae.

      Vos ego dulcisona consociabo lyra.

Linquite Amadryades silvas fontesque Napeae;

      Naiades et vasti linquite regna maris.

Vos quoque di nemorum fauni satirique priores

30

      Et quicumque colis culmina summa deus.

Heliades etiam Heridani pia numina laete

      Incipite ad citharas pellere humum pedibus.

Sorte pari Iachobo dabitur veneranda puella:

      Hos clari claros progenuere patres.

35

Alter eris socero gratus Pirandule semper,

      Cum referas mores filius ipse patris.

Cum genus antiquum magnis virtutibus ornes,

      Exemplum priscae nobilitatis eris.

Nobilitatis erunt insignia clara tuorum

40

      Fana quibus Thomae praesulis ossa manent.

Altera magnanimumque patrem prolemque romeam

      Rettulit et matris casta pudicitiam.

Cernite uti roseos vultus sine fraude colores

      Oraque verginei signa pudoris habent.

45

Ne timeas: dabitur coniunx, veneranda puella,

      Qui ferat optatis gaudia mille tuis;

Gaudia nascenti tibi quae cecinere sorores,

      Dum traherent vitae stamina certa tuae.

Vos agite interea dominae natalis et ortus

50

      Pulcher Hymen sancta foedera ferte face;

Faustaque dii patrii sponsis in tempora servent

      Connubia et celebri prole secundet amor.

Festum Hyminis cecini, festum celebrate puellae:

      Desino vos cithara consociare mea.