Siquis ad excelsi sublimia templa Tonantis

      Tendat et optati limina sancta dei,

Non decet ire levem penitus neque munere quamvis

      Exiguo vacuas convenit esse manus.

5

Affert Indus ebur, fulvum dat Lydius aurum,

      Turis odoriferi munera gestat Arabs.

Fert Epirus equas et candida vellera Seres

      Purpureaeque Tyrus tegmina vestis habet.

Nilus habet messes, Chalybum quoque munera ferrum,

10

      Conspicuus fertur ex Oriente lapis.

At tua qui venio visurus numina, Caesar,

      Nam meus in terris Iupiter unus ades:

Carmina sola fero. Non est mihi gemma nec aurum

      Quaeque solent merces ex Oriente vehi:

15

Carmen habe et nostro pro munere suscipe carmen;

      Saepe iuvant magnum numera parva Iovem.