Domenico Silvestri ante adventum Pape

Nuntia venturi contraria fama per orbem

Scinditur an veniat propriam clementia summi

Pontificis reparare domum sedesque verendas.

Alter ait "veniet. quis enim iam iustior umquam

5

Aut pietate prior sanctum diadema recepit

Hoc duce? regna suis gaudebunt regibus, urbes

Civibus et nullus flebit dare colla catenis.

Libertas sua signa geret totumque per orbem

Ytalicum iam tuta subit, sevosque tirampnos

10

Corripit ipsa metu quid erit cum sceptra per urbem

Gesserit atque arva summus reget Ytala rector."

Hinc alius fervens, "quis stultior ambigat ipsum

Huc iter acturum? iusti servator et equi

Ore tulit proprio. scripturas ipse per orbes

15

Multiplicat, sanctoque suo Florentia patri

A petra qui nomen habet num voce reclusit?

Quem rubeo capite, mente auspicor, ipse videbo

Ire adhuc, et fratrum dii faxint esse cohortis,

Ne crines et eius careant deitate Latini.

20

Insignire parat lecto sub numine marchum

Et sancto sotiare gregi; felix ne galero

Sit caput, an ipse potius per vertice, lis est.

Adventus hec causa patet presaga futuri.

Nonne etiam sacre sedes actantur in urbe?

25

Quis causa sine credet agi? michi credite: dudum

Hic pater almus erit, nec me sententia fallit."

Hinc alter alias cupiens defendere partes,

"Nec ratione tamen finxere venire nec umquam

Accedet." "patriamque suam," cui proximus inquit,

30

"Deseret? ambiguamque sibi petet urbe quietem?"

Hic tamen, "adventum simulat sua commoda versans

Donec is Ytalice pactis sua vincula genti

Iecerit et secum faciat pactumque ligamque.

His actis iam fama minor nova causa morandi

35

Surgit et adventus alium differtur in annum,

Gallicus interea - quod sic foret esto voluntas -

Astus adest, crebrisque sacras rationibus aures

Tundit et 'Ausonice mores tu gentis acutos

Ignoras,' ait, 'alme pater, quantumque pericli

40

Inmineat mutare loco sacra culmina mundi.

Non scire est que certa manent subponere casu.

Preterea magni motus dubiique tumultus

Et novitas mundi obicit variantis et urbis

Insidie et cives assueti tempnere habenas!"

45

Et sic Hespericas voces vaga fama per urbes

Iam volitare facit vastoque refluctuat estu.

Me tamen in primam partem sententia vertit

Vt veniat, quantumque michi licet ortor ad urbem

Parvulus et mentis manibus genibusque reflexi.

50

Alloquor, "alme parens, rector iustissime sancte

Sedis apostolice, Summus cui Rector Olimpi

Ferre vires vocesque suas commisit et arcis

Sideree claves, solium decus imple verendum.

Ytaliam dignere tuam, dirisque tirampnis

55

Eripe iam laceram. Vrbanus non viderit urbem

Ex qua nomen habet?" videor iam murmure leto hec

Experiam sentire loqui, "santissime patrum

Accelera, civesque tuos dissolve catenis

Pestiferis; pigeat gregis et miserare tuorum.

60

Quid stas? iam fugiunt iuga per deserta latrones;

Iam silvis securum iter; atra nocte per omnes

Aut montes vallesque velit mercator adibit

Tutus, et insidie timidis refugantur ab antris.

Sis citus, alme parens; Latio succurre labanti.

65

Tuque in arce fave, noviter cui tempora pressit

Pilleus iste sacer; tua te Florentia supplex

Orat ut in magnis menti tibi perstet agendis

Ortarique patrem felicia cepta sequatur.

Vosque alii omnes, sacra cohors, adhibete favorem

70

Huic cepto, viduosque diu reparate penates

Vnde sacros merite titulos assummitis omnes.

Adventum suadete patri. bona sidera reges

Aspicient, civesque suis concordia nectet

Civibus, et terris cunctis dominabitur equum.

75

Cunctus ager segetes agresti reddet opimas

Agricole. fulvis revirescent prata capillis.

Stagna dabunt nitidas fontes, et flumina lymphas,

Iamque greges, armenta suis in fetibus ampla

Gaudia percipient. ursi taurique nocentes

80

Inmundive sues et fetidus yrcus abibunt.

Iam non agna lupos, vitulus nec cerva leones

Orrebunt, sed cuncta nova sub pace regentur.

Preteream te, dira viros tumido hore deiscens

Vipera, que tot stagna lacus tot flumina giro

85

Circuis obliquo Lernea immanior idra?

Deficies, istas Papa regnante per urbes.

Iam video: tacite squamis sinuosa retorques

Colla metu, linguamque vibrans afflatibus uris

Qua tu repis agros, et inficis antra veneno;

90

Alcides sed, crede, novus tua terga domabit.

Ista per Ytalicas defert ambagine terras

Fama volans incerta tamen. Deus omine leto

Suscipe, et in melius tua det sententia ceptum.