Quae generosa canum soboles, quis cultus alendo
Sit catulo, unde suos Epirus clara Molossos,
Audacesque sibi commendet Sparta Lacones,
Diva refer. Tu venatrix Dictynna ferarum,
5
Quae iaculo celeres nemorosa per avia cervos
Traiicere, et timidos gaudes praevertere damas,
Huc ades, et nostro aspira, dea casta, labori.
Tu nemorum regina potens, tibi devia lustra,
Et vastos canibus studium est circundare saltus.
10
Namque tibi in vallesque cavas, montesque supinos
Antiquos divum lucos, sylvasque sonantes
Imperium est: saliens tecum decurrit Oreas
Montibus, et spoliis et caede superba recenti:
Ergo ades, et nostris adsis Latonia votis.
15
Principio catulus facie spectabilis alta
Hirsutis rigeat spatioso pectore villis:
Membra toris surgant latos animosa per annos:
Rectaque se crudo distendant robore crura.
Colla brevi tumeant spatio, glomerataque cervix
20
Disiectas ferat auricolas, radientque coruscum
Ravi oculi glaucive, et magno immitis hiatu
Ingentem fundat vasto clamore latratum.
Sic trepidum stabulis furem, tacitasque luporum
Insidias, illo nunquam custode timebis.
25
Postquam etenim pingui rediere e gramine sera
Nocte greges, tremulisque vocant balatibus agnos
Lanigerae matres, explorat ovilia circum
Ipse vigil, dominoque timens, vestigat ubique,
Ne fur vel stabulo repat, vel clausa fatiget
30
Septa lupus, sensimque velit se immittere tecto.
Nec soli invigilat pecori generosa propago:
Namque alius (comperta loquor) levisomnus heriles
Excubat ante fores, abigitque latratibus hostem.
Vix audita alius domini mandata capessit
35
Sedulus, et nutum observat, vocemque loquentis.
Ille sagax leporem scrutari, hic utiles undis
Sollicitat medio revolantes flumine mergos.
Ille feras vastis turbare cubilibus, ille
Fulmineos agitare sues bonus, ille fugaces
40
Persequier capreas, celeres his gloria cervos
Sistere, et immani concurrere cominus ursae:
Aut gravia Eoi prosternere pondera Barrhi.
Hic alius celsa pascentes rupe iuvencos,
Hircososque greges comitatur, et ardua praeceps
45
Saxa per et scopulos montana armenta tuetur,
Praedones aut dente premens, aut ipse vicissim
Occumbens, animoque ruens in vulnera forti.
Est etiam ex illis gens martia, quaeque feroci
In medias ausit concurrere fronte cohortes.
50
Haec si terrifico mavortia classica cantu
Sanguineum accendunt opus, et clangore tremendo
Pugnaces acuant in tristia funera turmas,
Inspirentque animis rabiem, caecumque furorem,
Castra viris differta petit, custodia fidos
55
Certa capit vigiles, alternaque munia tractat.
Inde alias aliasque acies per cornua versa
Fronte locant, pugnasque ineunt, et bella lacessunt
Acrius, insultantque hosti, morsuque fatigant.
Non strepitu horrisono, aut ullo terrore moventur:
60
Nec celeres horrent Medo iaculante sagittas,
Pilave, et haemonio missas tyrone sarissas,
Liventisque globos plumbi, pandasque cateias,
Aut teretes rapido vibratos turbine contos,
Haec marti devotus amor, divaeque furenti
65
Negligit, et plagis gaudens, et strage cruenta.
Nec quenquam videas qui terga fugacia vertat,
Declinetque ictus duros, gladiosve, sed omnes
Aut fundunt hostem, aut communi clade feruntur.
His Colophoniacae (si vera est fama) phalanges
70
Auxiliis, hostem valido fregere duello:
Infaustoque olim cecidissent Caspia marte
Agmina, ni tali defensa cohorte fuissent.
Quae functis patribus (meritis ut digna rependant
Officia) canibus curant communia busta,
75
Exequiasque pares, et easdem in funere pompas.
Istis rex Garamas, solio deiectus avito
Militibus regnum, sedesque recepit ademptas.
Quin etiam Cymbrum iuvere ad bella ferocem,
Sanguineoque leves tenuere in pulvere Carros.
80
Hos Maurusiacus sibi Masinissa paravit
Custodes, hominum fidei diffisus, et isto
Non sibi conducto sua sceptra satellite cinxit.
Talis et antiquis custos nutritus Athenis:
Phoebigenae quoniam modico sacra vecta Epidauro
85
Sacrilego vigili servasset ab hoste latratu.
Quid referam quos auratis Minoia templis,
Creta refert positos vigiles? Quosque insula solis
Carpathii celebrat servantis littora ponti?
Adde etiam, quod nulla homini mage prodiga grati
90
Officii quadrupes, dominisque fidelior ipsis:
Nam movet ad numeros se se, et quo iusseris ibit
Ocyus, ad nutus iterumque iterumque recurrens,
Frigoribus vinci, aut rabioso nescius astro.
Et licet Herculeis fugias a Gadibus usque
95
Ad Tanaim, aut Arabas, rutilique volumina Gangis,
Vsque sequetur ovans, tua nec vestigia quoquam
Deseret, at lateri semper comes ibit herili.
Sistis iter? Sistit. Properas? Velocius Euro
Scindit in obliquum campos, cursuque lacessit
100
Aerias volucres. Quod si post terga relinquas
(Nam dominum crebro aspiciens observat euntem)
Ille moram cursu pensat. Viden ecce repente
A tergo ut vultuque hilaris blanditur amico,
Aut velut explorans prior in deflexa viarum
105
Exit, et insidias animo praesentit acuto?
Nec minus officii memor est quum pocula sumit
Tota domus, dulcique madent convivia baccho.
Concrepuere fores? Volat explorator, amicum
Si norit, blande admittit, pedibusque volutus
110
Haeret, et applaudit palpo, supplexque precatur
Effusi veniam temere latratus: at hostem
Aedibus exturbat, laniatuque urget, et ipsi
Limine, vestibulo, corte interdicit herili.
Quod si vim faciet grassator, et obvia forte
115
Arma ferat, iugulo intentans, in vulnera primus
Desilit, incursatque ferox, fremituque superbo
Obiectuque sui dominum tegit, et fera tentat
Praelia, nec fusum exhorret mucrone cruorem.
Testis erit dulci remeans Volcatius agro
120
Sera tenebrosam traherent cum tempora noctem
Quique olim thusca defensus in urbe senator
Nulla nisi primum caeso cane vulnera cepit.
Te quoque Paellaeo, Dari, quondam a rege fugatum
Ingentique manu spoliatum solus Hylactor
125
Belli inter casus Martisque pericula nunquam
Deseruit sortisque comes permansit iniquae.
Quid quod in flammas dominorum ignesque rogorum
Insiliunt alii? Et Cineres comitantur heriles?
Quid quod, et at bustum (tantus post funera bruto
130
Durat amor, tristique nequit consistere mente)
In multos mansere dies? Gemuloque latratu
Impia fleverunt dominorum fata suorum?
Nulla fames, nullaeque animos flexere ciborum
Illecebrae, sed enim magis insidet alto
135
Corde dolor, dominoque piget superesse sepulto:
Quod reliquum est vitae nocet, insomnesque ministrat
Nocte dieque animo curas, nova vulnera pascit
Irrequietus amor, tristesque exasperat iras:
Exangues donec vigor omnis deserat artus
140
Defessoque super sua fata cadavere claudant.
Adde quod infixos memori sub pectore vultus
Conspectosque semel, nullo obliviscitur aevo.
Iam duodena suo percurrens astra rotatu
Bisdenos radiis Titan lustraverat annos:
145
Ex quo Dulichios fines Laertia regna
Liquerat, et bello, et fluctu, iactatus Vlysses:
Quum tandem post multa trucis discrimina ponti
Contigit optatos portus, placidaque quiete
Fata dedere viro, atque Ithaca tellure potiri:
150
Iam neque Penelopae, fractoque aetate parenti,
Non Eumo, non Telemacho, sed cognitus Argo
Tantum erat, effoetis languenti viribus Argo.
Non tibi pulchra Tyros tantum tua purpura debet,
(Quamvis ardenti saturatas murice vestes
155
Laeta geras) quantum canibus, nec Sydonis esset
Lana repercussis vibrans fulgoribus ignes,
Ni canis Alcidae scopuloso in littore reptans,
Puniceo primum tinxisset labra veneno.
Nunc age, quis villae melior, gregibusque tuendis.
160
Quae volucri soboles cursu, nasove sagaci
Sit potior (nec enim solers dedit omnibus unum
Natura ingenium) quae sit ratio optima prolis
Formandae, quo Musa mihi dabit ordine dicam.
Ille igitur cui differtae custodia villae
165
Creditur, et vigili tristes in limine dantur
Excubiae, durum condiscat ferre laborem
A teneris, pinguique sero gliscentia pascat
Corpora, sub gelido recubans sine stramine dio:
Tum furvum villo fallat nigrante colorem
170
Noctis, ut excubias obscuro celet amictu.
Sed qui sub vigili simas pastore capellas,
Balantumque greges sequitur, candore per agros
Molle pecus referat, mentitaque vellera tergo
Assimulet, subitoque lupum improvisus hiantem
175
Terreat assultu, et trepidis depellat ab hoedis.
Quod si te montes venabula ferre per altos
Aetolosque iuvat per saltum tendere casses
Ipse tibi audaces Spartanae gentis alumnos,
(Nam stabulis villae melior, gregibusque molossus)
180
Elige, robusta quibus a cervice reiectae
Ad terram veniant aures, hirsutaque denso
Colla pilo latos fundant cum clunibus armos.
Adde etiam Albanos, qui quantum viribus apris
Occursare valent, fulvosque aequare leones,
185
Et vasto indomitos certamine frangere tauros,
Aligeras tantum cursu praevertere damas.
Sunt et Locrenses catuli, sunt Arcades, atque
Cypria quos Salamis, quos dives Iberia pascit.
Sunt et odorisequa celebres indagine, solis
190
Naribus insuetos investigare recessus,
Secretosque ferae docti deprendere calles.
Hos, simul ac foetae liquere cubilia matris,
Notaque despiciunt iam faucibus ubera duris,
Mollibus assuescas epulis, pinguique ferina
195
Saepe avidos acuas dentes, cervique cruentum
Ad spolium latrare doce, excuviasque recentes.
Inde tibi in vacuos educere proderit agros,
Vmbrosas nemorum valles, et inhospita tesqua
Ora tamen loro forti clamosa tenebis,
200
Nec nisi firmatos unquam patiere furenti
Setigero, aut sese venienti opponere cervo.
Acrius in vetitum tendent, invitaque habenis
Colla reluctantum cupient exire ministri.
Interea si forte gravi spiramine raucum
205
Increpuit cornu, toto iam pectore praedam
Concipiunt, queruloque replent lata arva boatu.
Inde suos etenim Lacedaemon Achaica laudat,
Assueti quoniam sylvis, cupidique ferarum
Praecipiti fervore ruunt, perque invia lustra,
210
Convallesque cavas, et sensibus horrida duris
Arva, et vulnificis dumeta rigentia spinis
Dente rotant praedas, indefessique sequuntur
Quod semel emissus est, illos non obvius amnis
Vicinos dirimens sinuoso gurgite colles,
215
Sistit, nec rapidos lato tenet obice cursus.
Et licet assiduo frangantur anhela boatu
Ora, trahantque aegros afflictis viribus artus,
Assequier tamen est animus, concussa fragorem
Silva dat, alta sonant late loca, curva resultant
220
Littora, miscentur totis fera murmura campis.
Diversa veniunt praestantes dote Molossi
Diversi ingeniis, non omnibus omnia praestat
Natura, at vario ludit discrimine morum.
Nam cum sint volucris non ultima gloria cursus,
225
Nec saepe audaci formident impete fulvos
Frangere apros, cervosque fuga versare paventes,
Vberior tamen est illis, et fortior inde
Laudis causa venit, molli quod tempora somno
Pauca terunt, seu flammigero det limina curru
230
Phoebus, seu niveas agitat Latonia bigas,
Somnifero obliquum volvens iubar axe per orbem.
Sed vigili domino cura, raroque cadente
Lumine prospiciunt, et herilia munere circum
Claustra fremunt, ne sint nocturno pervia furi,
235
Neve lupo, tutaque greges statione quiescant.
Sin autem vacui spatiosa per aequora campi
Auritum tepido leporem exturbare cubili,
Accipitremque iuvat volucri praetendere apricae,
Hic tibi sunt humiles villo breviore legendi,
240
Indidit ipsa suum quibus olim Hispania nomen.
Hi si forte levis toto lepus errat in arvo,
Pone legent rostro vestigia nota sagaci:
Et modo transverso, modo recto iugera sulco
Scrutantur, validis iterum sudata iuvencis.
245
Nec prius absistent putres percurrere glebas,
Et studium tremulo caudae ostentare flabello,
Quum vestigati subito lepus aequoris ampla
Corripiat spatia, et campo se credat aperto
Ocius, insequitur Pterelas, cursuque citato
250
Intervalla facit lati decrescere campi.
Iam propior propiorque micat, iam captat hianti
Summa pedum rostro, iam terga fugacia stringit.
Ille pavet, flexoque obliquat tramite cursus,
Et dubia trepidans formidine, iamque teneri
255
Se putat, et rursum tangentis ab ore recedit,
Fataque momento sibi prorogat, aemula donec
Rostra levis mergat miserando in corpore victor,
Fulmineus victor, gemino cui tramite lumbos
Spina subit graciles, et castigata coercet
260
Ilia substrictus venter, stant crura volantem
Praeteritura Notum, longo internodia ductu
Pes gerit, in caelum tolluntur acumine bino
Auricolae, flexoque in laevia tergora gyro
Erectae redeunt falcata volumina caudae.
265
Sunt humiles etiam Melitaea ex gente catelli,
Quos gremio gestare solent Heroides, hique
Nec cursu celerem sectantur praepete cervum,
Nec lato pavidum leporem scrutantur in arvo:
Veste sedent fluxa, et pedibus mylesia calcant
270
Serica, sub tyrioque recumbunt molliter astro:
Nunc caput exertant gremio, saliuntque decorum
Nobilis in vultum dominae, lusuque fatigant
Labra corallino modicum suffusa rubore,
Vernantesque genas, et ebur superantia colla,
275
Smaragdoque graves digitos, et Perside gaza
Nunc tenui latrare sono, pictoque videbis.
Lascivire toro, aut nitida iuveniliter aula.
Hoc mihi, Coelicolae, tristes lenimine curas,
Taediaque humanae concedite pellere vitae.
280
Hac, utinam mea vota tenus sint improba, numquam
Divitias Arabum ingentes, opulentaque Croesi
Regna petam, nunquam ut vanos mihi purpura fasces
Ostentet, populi applausu plebisque favore
Sollicitis precibus superos ambire iuvabit.
285
At sylvae, gelidique specus, cava lustra ferarum,
Ruraque, et arcana labentia flumina valle
Sunt animo, hic reliquam vitae, atque exstrema sororum
Pensa mihi rumpi exoptem, securus ab omni
Invidia, et misera procul ambitione, beatus
290
Sorte humili, et tristi curarum liber ab aestu.
Talia condebam Venusino lentus in agro:
Dum pueri (quorum ratio mihi carior omni
Laude fuit) reditum ad Musas, recidivaque fesso
Indulgent studia, et ferulae sceptra improba cessant.