Hymnus Beatae semper Virginis Mariae, ad IIl.mum et Exc.mum Principem Dominum Herculem Estensem Ducem Ferrariae

O Dei mater veneranda Virgo,

Praestet ut nobis veniam precare

Filium, per quem genus est redemptun

Faucibus Orci.

5

Missus e celso Gabriel Olympo

Te coruscanti facie salutat:

Regis hoc summi referente sacra

Iussa pavescis.

Spiritus sanctus Paracletus in Te

10

Mox supervenit radiante lapsu,

Mox obumbravit tibi summa virtus

Omnipotentis.

Venter intactus, sacer et pudicus

Permanet mundus, velut ante, quale

15

Splendet illaesum, penetrante solis

Lumine, vitrum.

Conditor caeli, maris atque terrae,

Et suae solus Genitricis auctor

Corpus, humanum genus ut foveret,

20

Induit ex Te.

Quom salutasti gravidam, senili

Ventre, Praecursor saliente motu

In tuo pronus veneratur almo

Viscere clausum.

25

Quom paris nulli cruciant dolores,

Nec tuum ventrem labor angit ullus;

Vnde te semper pariens gementi

Invocat ore.

Huc citi pergunt gregibus relictis

30

Voce pastores moniti superna,

Et colunt proni positum cubili

Vimine texto.

Tres Magi solis veniunt ab ortu,

Praevium stellae iubar et secuti

35

Offerunt nato pia dona mirrhae,

Thuris et auri.

Ille qui toti dominatur orbi,

Cui cohors caeli famulatur omnis,

Sacra maternis tua cinctus ulnis

40

Vbera suxit.

Ille, quem puro gremio tulisti,

Organum mutis tribuit loquelae,

Mortuis vitam, miseris salutem,

Lumina caecis.

45

Ille, quas Daemon rapiebat unco

Devias clausit pecudes ovili;

Ille nos omnes crucefixus atra

Morte redemit.

De triumphato rediens barathro

50

Victor exacto biduo resurgit,

Et quater dena petit alta caeli

Sidera luce.

Clausa quae cunctis fuerat beatis

Tam diu primi vitio Parentis,

55

Omnibus per Te reseratur alti

Ianua caeli.