Ad uetulam sibi infensam
Flectere quid tentas animum, scelerata, puellae?
Quid totiens fraudes insidiasque paras?
Stulta quid implicitos disiungere quaeris amantes,
Vltima quos poterit uix soluisse dies?
5
Nescis quid sit amor, nullos experta calores:
Nulla tibi in gelido pectore flamma fuit.
Humano nec te conceptam semine credam,
Sed de Gorgoneis prosiluisse comis.
Tisiphone mater, genitor tibi Cerberus Orci
10
Ianitor et nutrix saeua leaena fuit.
Nulla tibi pietas Baccharum more per aedes
Curris et accensa concita mente furis.
Quid referam quotiens patulas furibunda fenestras
Clauseris et duras impetuosa fores?
15
Aut quotiens dum templa petis ceruice retorta
Flexeris in nostrum lumina torua caput?
O quotiens postis rimas occludis hyantes
Centenaque grauas limina clausa sera!
O quotiens gelido surgis tremebunda cubili
20
Cum latrat ad lunam nocte silente canis!
Meque putans summi uectum per culmina tecti,
Accensa quaeris lampade sola domum.
Desine, turpis anus, pariles extinguere flammas,
Desine compositam rumpere uelle fidem.
25
Litus aras, tenuem tibi ducit Aranea telam,
Pellere tantaleo quaeris ab ore sitim.
Seruari corpus poterit, mens ipsa ligari
Non poterit; nullo uincitur illa iugo.
Clausa fuit Danae ferratae in culmine turris;
30
Hanc tamen ignota fraude fefellit amor.
Inter uirgineos coetus castamque Dianam
Peccauit nitido quae micat Vrsa polo.
Centum Argo fuerant oculi, tamen ille tueri
Centeno uaccam lumine non potuit.
35
Rumpere qui potuit turrim, qui claudere centum
Lumina, non uetulae lumina fallet amor?