M CCCC L XXV . DIE . XXVII . FEBRVARII

Aurea si quando fuerint sua tempora mundo,

      Neverit et facili stamina Parca manu,

Principe sub Xysto vigent ea tempora, rege

      Qualia Saturno secla fuisse ferunt.

5

Nunc ver perpetuum est, florent nunc omnia, regnat

      Relligio et sacra cum pietate fides;

Nunc Astrea pios celo delapsa penatis

      Incolit et claras tollit in orbe faces.

Eripe te medio pravorum turba sacello,

10

      Est tibi nam sacra nullus in urbe locus.

Nunc virtus colitur, virtuti magna parantur

      Premia, nunc probitas maxima sceptra tenet.

Optima Saturni memorantur secla, poetae

      Illa canunt, nostris cernimus haec oculis.