De commoditatibus quas habent rurales amores
Ter felix supraque modum pagana iuventus,
Quantum vester habet commoditatis amor.
Sola lavat pannos et aquam fert sola manetque
Sola domi, vadit sola puella foras.
5
Sola legit procul a Laribus quodcumque legumen;
Sola sues abigit solaque pascit oves.
Sub divo segetem lini commacerat: illi
Dedecus est nullum, sedulus adsit amans.
Quales tunc illos nos credimus esse labores,
10
Sic mihi sisyphium non grave pondus erit.
Advenit simulac vindemia, quanta voluptas
Vvas vicina conseruisse manu.
Inque vicem musto faciem turpare fluenti
Saepius in medios, o Cytherea, sinus.
15
Quid quod ventris onus quotiens inferbuit, itur
In segetes nulla concomitante procul?
Quam crebra hinc soleant nasci fallacia, quis non
Viderit astutus cui modo notus amor?
Irasci nescit, nil poscere rustica novit,
20
Fingere nil didicit, dissimulare nihil.
Quicquid habet sub corde nequit reticere et amantem
Ignorat lenta solicitare mora.
Denique simplicitas ipsa est: urbana valete,
Furta catenatis illaqueata dolis.
25
Non pudor hic simul ire sacris ad templa diebus
Et simul ad fluvios in triviisque loqui.
Saepe vehi cymba et plaustro contingit eodem
Et simul ad festas saepe sedere dapes.
Et quis an eveniant etiam meliora, quis, inquam,
30
Novit an in socio detur inesse toro?