Alexandro Braccio salutem
Qualis prisca fuit Mimnermi musa poetae
Antimachus quales edidit ore modos,
Et cyneraei sunt qualia carmina vatis,
Qualia vel nostris Vmbria culta dedit;
5
Aut quales cecinit facundo pectore versus
Ingenium cuius Delia pulchra fuit,
Vel sua crudeli qui fodit viscera ferro,
Quisque procul getico pulsus in orbe canit;
Talia dulcisono modularis carmina plectro.
10
O animae, Bracci, portio magna meae.
Quare, age, si quis erit nigro qui dente lacessat
Bassum, liventes iniiciatque manus,
Ipse tuo fortem clypeum protende sodali:
Sic faveat semper turba novena tibi,
15
Praebeat et solitum cantus elegia tenorem,
Et dominam placida flectere voce queas.