Osculum Panthiae
Qualia lascivo dedit oscula saepe Tonanti
Dardanius Phrygia raptus ab arce puer,
Qualia formosae Veneri dilectus Adonis,
Qualia pastori Tyndaris Iliaco,
5
Qualia Taenarides tribuit puer oscula Phebo,
Amphytrioniadae qualia pulcher Hylas,
Qualia purpureae quae conspicit omnia lunae
Latmius in somnis contulit Endymion,
Talia mille dedit roseis mihi basia labris
10
Panthia, fervoris prima favilla mei.
Quantus odor, quantum divini nectaris illis,
Quantus mellis inest ambrosiaeque liquor!
Cinama quod spirant, quod olet Cinireia myrrha,
Et quod odorus Arabs Coriciumque crocum,
15
Succina quod fragrant manibus tractata, quod omne
Vnguentum et fracto fusa Falerna cado,
Balsama quod spirant, redolent quod florea rura,
Quod citrum et violae purpureaeque rosae,
Hoc redolent dominae dulcissima basia nostrae,
20
Hoc os formosum labraque purpurea.
O me foelicem, cui tu, pharetrate Cupido,
Et Cytherea Venus tot tribuistis opes!
Non ego fortunas Cresi Pythisque Bithini
Expeto, non gazas divitiasque Midae:
25
Me mea formosis teneat foveatque lacertis
Panthia, rex regum tunc ego summus ero.
Me iuvat, ut dominae placeam, tolerare labores
Erumnasque graves imperiumque ferox;
Me iuvat estivas sub Cancro ducere luces,
30
Egocerique nives ire ad Hyperboreas.
Obsequar ut dominae, durum nil ferre recuso:
Si iubeat, Stygias nunc aditurus aquas.
Tantum forma valet, tanti est spectata venustas
Et decor et facies et lepor atque sales.
35
Si redeant veteres facundo pectore vates,
Elysium vacuet si pia turba nemus,
Si Maro nunc repetat superos et culta Tibulli
Musa et Nasonis Pieriusque chorus,
Nemo satis queat eximiam laudare puellam
40
Et decus et faciem corporis egregii.
Huic est forma potens, sunt emula lumina stellis,
Lumina quae possent sollicitare deos.
Procerum corpus dominae est teretesque lacerti,
Est formosa manus articulique leves,
45
Pes parvus fulvaeque come facundaque lingua,
Sunt modici risus Atticus estque lepos.
Haec candore nives vincit superatque rosarum
Fulgorem, in toto corpore nulla nota est.
Quicquid agit, sive incedit, sive accubat aut stat
50
Aut sedet, exornat subsequiturque decor.
Tota decens, urbana, sagax, est tota venusta
Totaque nativo pulchra colore placet.
Non cerusatis incedit candida buccis
Nec fucata genas atque supercilia.
55
Esopa non spirat Pharii nec stercora piscis,
Non creta aut asinae corpora lacte fovet,
Non oculos stibio linit aut fuligine pingit.
Ah, pereant quibus haec cura decoris inest!
Quid iuvat externo formam corrumpere luxu
60
Atque peregrinis cultibus inficere?
Nonne deus vobis faciem dedit? heu scelus! illam
Polluitis fuco et leditis artificem.
Iuppiter hinc in vos iaculatur fulmina, mittit
Excidium, pestes foemineumque malum.
65
Nostra Venus vivo graditur formosa colore
Nativisque placet dotibus atque bonis.
Quantum inter flores amaranthi et lilia fulgent
Et violae et loti coccineaeque rosae,
Quantum inter stellas collucet luna minores,
70
Cynthia te quantum Cynthius exuperat,
Tantum inter pulchras radiat formosa puellas
Panthia purpureis emula sideribus.
Cedat Peligno celebrata Corina poetae,
Cinthia cum Nemesi, culte Tibulle, tua,
75
Lesbiaque assurgat dominae Ticidaeque Perilla
Et tu iam Gallo dicta Lycori tuo.
Dissimulet faciem Lais Ephyreia, cuius
Traxerat attonitos forma superba viros.
Forma Menandreae fuerat nec Thaidos olim
80
Tanta, nec est Phyrnes tam decor egregius.
Sordida Penelope, turpis Virginia, turpis
Est collata tibi, Panthia, Sulpitia.
Cedat Darei coniunx, Cornelia Magni,
Hipodame et comptis Laodomia comis;
85
Cedat et Abradatae consors tibi, Panthia, cuius
Ipsa geris nomen nomine fictitio.
Si Paris hanc Phrygius Phrygia spectasset ab Ida,
Non peteret portus, Tyndari pulchra, tuos.
Iuppiter hanc videat, subito descendet Olympo,
90
Fiet olor, satyrus, taurus et Amphitrion.
Dia Camilla minor, minor est Lucretia et omnes
Italides matres Cecropiaeque nurus.
Stratonice Antiochi dispar, Popea Neronis,
Lamia Demetri, candida Leucothea.
95
Cedite iam divae Tritonia, Iuno, Dione,
Quas Paris Ideis viderat ante iugis.
Quid maiora loquor? te Penthesilea probabit
Et colet, heu nomen dulcius ambrosia!
Panthia formosis formosior heroinis
100
Digna soror Phebo, coniuge digna Iove est.
Digna quidem caelo facies iamque incipit esse
Cognita et Eois, cognita et Hesperiis.
Hanc ego viventem vivus, defunctus amabo
Hanc quoque defunctam: sic iubet alma Venus.
105
O decus, o facies, o Cypride digna parente,
O et germanis digna Cupidinibus!
Panthia, dii tibi dent tercentum Nestoris annos,
Secula Titoni perpetuumque decus.
Oscula foelicem dudum et fecere beatum
110
Me tua: si dederis caetera, divus ero.
Interea ardentem quaeso miserare Philippum:
Sit tibi cura mei, me cape mancipium.