Lucio Francisco filio Pontanus
pater inferias solvit

Has, Luci, tibi et inferias tibi et annua solvo,

      Annua vota piis, hei mihi, cum lacrimis,

Haec, Luci, tibi et ad tumulos positumque feretrum

      Dona pater multis perluo cum lacrimis.

5

Haec dona inferiasque, heu heu, hunc nate capillum

      Incanamque comam accipe et has lacrimas;

His lacrimis, his te inferiis, hoc munere condo.

      Nate, vale aeternum, o et valeant tumuli;

Quin et hient tumuli, et tellus hiet, et tibi meme

10

      Reddat, et una duos urna tegat cineres.