Venantius Fortunatus carminum appendix 6

Altre sezioni


Regia progenies, praecelsi et mater honoris

      Vndique regnantum cincta decore pio,

Gallia cuius habet genus et Hispania fetum,

      Masculus hinc moderans, inde puella regens:

5

Auspicium felix sit prosperioribus annis:

      Hic tegat Allobrogas, dirigat illa Getas,

Gentibus et geminis pariter tua germina regnent

      Et tibi det fructui iste uel ille locus,

Quo te circumdet, pia, blanda corona nepotum,

10

      De genito et genita bis genitalis aua.

Illos auditu, hos uisu laeta recensens,

      Praeiens hinc gaudens, inde sed aure fauens

Subque tuis cernens regiones mater utrasque

      Cum populo et patria laetificeris aua.

15

Audulfum famulum commendo, me quoque secum:

      Sic maneat cunctis gloria uestra nitens.