Venantius Fortunatus carminum libri 11, 3


Mater opima, decens, uoto laetare beato,

      Gaude: natalem filia dulcis habet.

Hanc tibi non uterus natam, sed gratia fecit;

      Non caro, sed Christus hanc in amore dedit.

5

Quae sit in aeternum tecum, tibi contulit auctor,

      Perpetuam prolem dat sine fine pater.

Felix posteritas quae nullo deficit aeuo,

      Quae cum matre simul non moritura manet!

Sit modo festa dies, sancto Radegundis honore:

10

      Agnen hanc uobis agnus in orbe dedit.

Gaudia distensos pariter celebretis in annos

      Et per uos populus uota superna colat,

Virgineosque choros moderamina sancta docentes

      Perpetuae uitae distribuatis opes.

15

Hinc longinqua salus teneat uos corpore iunctas,

      Rursus in aeterno lumine iungat amor.