Martianus Capella de nuptiis Philologiae et Mercurii 9, 997


997.

Habes senilem, Martiane, fabulam,

Miscilla lusit quam lucernis flamine

Satura, Pelasgos dum docere nititur

Artes cathedris uix amicas Atticis,

5

Sic in nouena decidit uolumina.

Haec quippe loquax docta indoctis aggerans

Fandis tacenda farcinat immiscuit

Musas deosque, disciplinas cyclicas

Garrire agresti cruda finxit plasmate.

10

Hac ipsa namque rupta conscientia

Turgensque felle ac bili "multa chlamyde

Prodire doctis approbanda cultibus

Possemque comis utque e Martis curia;

Felicis" inquit "sed Capellae flemine

15

Indocta rabidum quem uidere saecula

Iurgis caninos blateratus pendere,

† proconsulari uero dantem culmini

Ipsoque dudum bombinat ore flosculo

† decerptum falce iam canescenti rota,

20

Beata alumnum urbs Elissae quem uidit

Iugariorum murcidam uiciniam

Paruo obsidentem uixque respersum lucro,

Nictante cura somnolentum lucibus;

Ab hoc creatum Pegaseum gurgitem

25

Decente quando possem haurire poculo?"

Testem ergo nostrum quae ueternum prodidit

Secute nugis, nate, ignosce lectitans.