Martianus Capella de nuptiis Philologiae et Mercurii 9, 902


902.

Aurea flammigerum cum Luna subegerit orbem,

Rosis iugabo lilia.

Virgo deusque sacro sociabunt foedera lecto:

Fulcris parate cinnama.

5

Hesperus intactam seruet licet usque puellam,

Nuptam uidebis, Phosphore.

Nec matris lacrimae pressi nec uiribus ungues

Nexus ualebunt rumpere.

Ne thalamos metuas; eris hoc, quod Iuno Tonanti est,

10

Quae nunc sorore dulcior.

Si placuit docti sollertia sacra mariti,

Magis placebunt oscula.

Aurora exoriens roseis spectabit ocellis

Floris resecti praemia.

15

Ipse ego pallentem speculabor luce puellam

Sese occulentem uisibus.

Conscia iam Veneris noua serta parate Napeae

Crocumque lecto aspargite

Inque torum uiolas certatim fundite conchis;

20

Puluinar almum comite.

Crinale spicum pharetris deprome Cupido

Libens capillum soluere.

Flammea uirgineum quae obnubere sueta pudorem

Regina deme Pronuba.

25

Te blandum, teneri quae conscia sola doloris,

Venus decens solabitur.

Quae nunc dura nouo nescis committere amori,

Parabit illa pectora.

Tu modo, quae mando, oculos deiecta decoros

30

Reconde mentis intimo:

Doctilocum <pul>chris iuuenem complexa lacertis

Fecunda redde pignera.