Martianus Capella de nuptiis Philologiae et Mercurii 7, 725


725.

Postquam conticuit prudens permensio terrae,

Innuba, sollertes curam quae instigat in artes,

Sic abacum perstare iubet, sic tegmine glauco

Pandere puluereum formarum ductibus aequor.

5

Altera tunc etiam gerularum accire iubetur

Germanam doctae, mundum quae admensa, sororis.

Nec mora digreditur. tunc rursus dia Voluptas

Ipsius aetheria Cylleni immurmurat aure:

"Cum doctas superis admirandasque puellas

10

Approbat Armipotens, tu optati lentus amoris

Gaudia longa trahis captumque eludis honorem?

Seria marcentem stupidant commenta maritum?

Talia complacita spectat fastidia uirgo,

Nec te cura tori, nec te puer ambit herilis,

15

Nec mea mella rapis? quaenam haec hymeneia lex est?

In Veneris sacro Pallas sibi uindicat usum;

Quam melius thalamo dulcis Petulantia feruit!

Casta maritalem reprimit Tritonia mentem

Et nuptae non aequa uenit; poscenda Dione est!

20

Conueniensque tibi potius celebrare Priapum."