Congenitae in Christo gentis mihi castus ab alto
Insinuatus amor, proprias excedere uires
Me iubet, atque pias accendere carmine mentes.
Ne post confectum celebris uictoria bellum,
5
Securos animos incauta pace resoluat:
Ceu metus eliso iam nullus ab hoste supersit,
Nec caput attriti uirosum palpitet anguis.
Vnde igitur commenta mali sopita resurgant,
Quemue ipso de fine dolum noua promat origo,
10
Da fari, Pater omnipotens, artemque malignam
Pandere, prostratus qua rursum nititur error.