Omnipotens genitor rerum, cui summa potestas,
Exaudi si iusta precor: ne sit mihi tristis
Vlla dies, placidam nox rumpat nulla quietem.
Nec placeant aliena mihi, quin et mea prosint
5
Supplicibus nullusque habeat mihi uota nocendi
Aut habeat nocitura nihil. male uelle facultas
Nulla sit ac bene posse adsit tranquilla potestas.
Mens contenta suo nec turpi dedita lucro
Vincat corporeas casto bene conscia lecto
10
Illecebras, turpesque iocos obscenaque dicta
Oderit illa nocens et multum grata malignis
Auribus effuso semper rea lingua ueneno.
Non obitu affligar cuiusquam aut funere crescam.
Inuideam numquam cuiquam nec mentiar umquam.
15
Adsit laeta domus epulisque alludat inemptis
Verna satur fidusque comes nitidusque minister,
Morigera et coniunx caraque ex coniuge nati.
Moribus haec castis tribuit deus, hi sibi mores
Perpetuam spondent uentura in saecula uitam.