Praefatio
Inuenta primus secuit qui naue profundum
Et rudibus remis sollicitauit aquas,
Qui dubiis ausus committere flatibus alnum
Quas natura negat praebuit arte uias,
5
Tranquillis primum trepidus se credidit undis
Litora securo tramite summa legens;
Mox longos temptare sinus et linquere terras
Et leni coepit pandere uela Noto;
Ast ubi paulatim praeceps audacia creuit
10
Cordaque languentem dedidicere metum,
Iam uagus inrumpit pelago caelumque secutus
Aegaeas hiemes Ioniumque domat.