Praefatio
Qui modo sublimes rerum flectebat habenas
Patricius, rursum uerbera nota timet
Et solitos tardae passurus compedis orbes
In dominos uanas luget abisse minas.
5
Culmine deiectum uitae Fortuna priori
Reddidit, insano iam satiata ioco.
Scindere nunc alia meditatur ligna securi
Fascibus et tandem uapulat ipse suis.
Ille citas consul poenas se consule soluit:
10
Annus qui trabeas hic dedit exilium.
Infaustum populis in se quoque uertitur omen;
Saeuit in auctorem prodigiosus honos.
Abluto penitus respirant nomine fasti
Maturamque luem sanior aula uomit.
15
Dissimulant socii coniuratique recedunt,
Procumbit pariter cum duce tota cohors;
Non acie uicti, non seditione coacti;
Nec pereunt ritu quo periere uiri.
Concidit exiguae dementia uulnere chartae;
20
Confecit saeuum littera Martis opus.
Mollis feminea detruditur arce tyrannus
Et thalamo pulsus perdidit imperium:
Sic iuuenis nutante fide ueterique reducta
Paelice defletam linquit amica domum.
25
Canitiem raram largo iam puluere turpat
Et lacrimis rugas implet anile gemens
Suppliciterque pias humilis prostratus ad aras
Mitigat iratas uoce tremente nurus.
Innumeri glomerantur eri sibi quisque petentes
30
Mancipium solis utile suppliciis.
Quamuis foedus enim mentemque obscaenior ore,
Ira dabit pretium; poena meretur emi.
Quas, spado, nunc terras aut quem transibis in axem?
Cingeris hinc odiis, inde recessit amor.
35
Vtraque te gemino sub sidere regia damnat:
Hesperius numquam, iam nec Eous eris.
Miror cur, aliis qui pandere fata solebas,
Ad propriam cladem caeca Sibylla taces.
Iam tibi nulla uidet fallax insomnia Nilus;
40
Peruigilant uates iam, miserande, tui.
Quid soror? audebit tecum conscendere puppim
Et ueniet longum per mare fida comes?
An fortasse toros eunuchi pauperis odit
Et te nunc inopem diues amare negat?
45
Eunuchi iugulum primus secuisse fateris;
Sed tamen exemplo non feriere tuo.
Viue pudor fatis. en quem tremuere tot urbes,
En cuius populi sustinuere iugum!
Direptas quid plangis opes, quas natus habebit?
50
Non aliter poteras principis esse pater.
Improbe, quid pulsas muliebribus astra querellis,
Quod tibi sub Cypri litore parta quies?
Omnia barbarico per te concussa tumultu.
Crede mihi, terra tutius aequor erit.
55
Iam non Armenios iaculis terrebis et arcu,
Per campos uolucrem non agitabis equum;
Dilecto caruit Byzantius ore senatus;
Curia consiliis aestuat orba tuis:
Emeritam suspende togam, suspende pharetram;
60
Ad Veneris partes ingeniumque redi.
Non bene Gradiuo lenonia dextera seruit.
Suscipiet famulum te Cytherea libens.
Insula laeta choris, blandorum mater Amorum:
Nulla pudicitiae cura placere potest.
65
Prospectant Paphiae celsa de rupe puellae
Sollicitae, saluam dum ferat unda ratem.
Sed uereor, teneant ne te Tritones in alto
Lasciuas doctum fallere Nereidas,
Aut idem cupiant pelago te mergere uenti,
70
Gildonis nuper qui tenuere fugam.
Inclita captiuo memoratur Tabraca Mauro,
Naufragio Cyprus sit memoranda tuo.
Vecturum moriens frustra delphina uocabis;
Ad terram solos deuehit ille uiros.
75
Quisquis adhuc similes eunuchus tendit in actus,
Respiciens Cyprum desinat esse ferox.