Nulla est difficilis uitae uia. si fora feruunt
Litibus, actores gloria consequitur;
Laudatur recte rem qui gerit: auget opes rus,
<sulcat tuta> rates ueliuolum pelagus;
5
Si peregri sumptus superent, festiua uoluptas;
Si desint, tacitus pauperiem toleres,
Insontem exiguo praestat quia uiuere uictu
Quam male quaesitis luxuriare opibus.
Militiae excelsi euentus: saepe itur in altum
10
Regnorum columen militiae meritis.
Vxor participat curas, rem femina paruam
Prouehit ac fulgent coniuge diuitiae.
Sed lites fugitas et iurgia, quae solet uxor?
Cedo equidem, poteris uiuere liberius:
15
Natorum certe curaque metuque carebis,
Saepe ignominia luxuriae maculis;
Sed natis hominum crescit genus, inclyta surgit
Fama patris, si se natus erit melior;
Reddendum est mundo naturaeque omniparenti
20
Quod nobis lucis fenore crediderit.
Mens uiget ut corpus iuuenum. bene consulit aetas:
Tempora consiliis apta senes tribuunt:
Euadunt Veneris stimulos, ut seruus, acerbos,
Cum domini furias ac rabiem fugitat.
25
Neutrum optes igitur: namque est <et> uiuere dulce
Nec properare mori; cetera deliciae.
vid. AP 9, 360; epigr. 25 (quod hic refellitur); Ps. Auson. ecl. lib. 2, 51-64 p. 89 sq. P. ubi quod antecessit ex Graeco Pythagoricum de ambiguitate eligundae vitae confutatur