pseudo Cato disticha 2, praef.


Praefatio

Telluris si forte uelis cognoscere cultus,

Vergilium legito; quodsi mage nosse laboras

Herbarum uires, Macer haec tibi carmina dicit;

Si Romana cupis et Punica noscere bella,

5

Lucanum quaeres, qui Martis proelia dixit;

Si quid amare libet uel discere amare legendo,

Nasonem petito; sin autem cura tibi haec est,

Vt sapiens uiuas, audi quae discere possis,

Per quae semotum uitiis deducitur aeuum:

10

Ergo ades et quae sit sapientia disce legendo.