Postquam castra duces, pugnae iam mente, propinqui
Imposuere iugis admotaque comminus arma
Parque suum uidere dei, capere omnia Caesar
Moenia Graiorum spernit Martemque secundum
5
Iam nisi de genero fatis debere recusat.
Funestam mundo uotis petit omnibus horam,
In casus quae cuncta ferat; placet alea fati
Alterutrum mersura caput. Ter collibus omnis
Explicuit turmas et signa minantia pugnam,
10
Testatus numquam Latiae se desse ruinae.
Vt uidet ad nullos exciri posse tumultus
In pugnam generum, sed clauso fidere uallo,
Signa mouet tectusque uia dumosa per arua
Dyrrachii praeceps rapiendas tendit ad arcis.
15
Hoc iter aequoreo praecepit limite Magnus,
Quemque uocat collem Taulantius incola Petram,
Insedit castris Ephyreaque moenia seruat,
Defendens tutam uel solis turribus urbem.
Non opus hanc ueterum nec moles structa tuetur
20
Humanusque labor, facilis, licet ardua tollat,
Cedere uel bellis uel cuncta mouentibus annis;
Sed munimen habet nullo quassabile ferro
Naturam sedemque loci; nam clausa profundo
Vndique praecipiti scopulisque uomentibus aequor
25
Exiguo debet, quod non est insula, colli.
Terribiles ratibus sustentant moenia cautes,
Ioniumque furens, rabido cum tollitur austro,
Templa domosque quatit spumatque in culmina pontus.
Hic auidam belli rapuit spes improba mentem
30
Caesaris, ut uastis diffusum collibus hostem
Cingeret ignarum ducto procul aggere ualli.
Metatur terras oculis, nec caespite tantum
Contentus fragili subitos attollere muros,
Ingentis cautes auulsaque saxa metallis
35
Graiorumque domos direptaque moenia transfert.
Extruitur quod non aries impellere saeuus,
Quod non ulla queat uiolenti machina belli;
Franguntur montes planumque per ardua Caesar
Ducit opus: pandit fossas turritaque summis
40
Disponit castella iugis, magnoque recessu
Amplexus fines, saltus, nemorosaque tesqua
Et siluas, uastaque feras indagine claudit.
Non desunt campi, non desunt pabula Magno,
Castraque Caesareo circumdatus aggere mutat.
45
Flumina tot cursus illic exorta fatigant,
Illic mersa suos, operumque ut summa reuisat,
Defessus Caesar mediis intermanet agris.
Nunc uetus Iliacos attollat fabula muros
Ascribatque deis; fragili circumdata testa
50
Moenia mirentur refugi Babylonia Parthi:
En quantum Tigris, quantum celer ambit Orontes,
Assyriis quantum populis telluris eoae
Sufficit in regnum, subitum bellique tumultu
Raptum clausit opus. Tanti periere labores;
55
Tot potuere manus aut iungere Seston Abydo
Ingestoque solo Phrixeum elidere pontum
Aut Pelopis latis Ephyren abrumpere regnis
Et ratibus longae flexus donare Maleae
Aut aliquem mundi, quamuis natura negasset,
60
In melius mutare locum. coit area belli:
Hic alitur sanguis terras fluxurus in omnis,
Hic et Thessalicae clades Libycaeque tenentur;
Aestuat angusta rabies ciuilis harena.
Prima quidem surgens operum structura fefellit
65
Pompeium, ueluti mediae qui tutus in aruis
Sicaniae rabidum nescit latrare Pelorum,
Aut uaga cum Tethys Rutupinaque litora feruent,
Vnda Caledonios fallit turbata Britannos.
Vt primum uasto saeptas uidet aggere terras,
70
Ipse quoque a tuta deducens agmina Petra
Diuersis spargit tumulis, ut Caesaris arma
Laxet et effuso claudentem milite tendat,
Ac tantum saepti uallo sibi uindicat agri,
Parua Mycenaeae quantum sacrata Dianae
75
Distat ab excelsa nemoralis Aricia Roma,
Quoque modo terrae praelapsus moenia Thybris
In mare descendit, si nusquam torqueat amnem.
Classica nulla sonant iniussaque tela uagantur,
Et fit saepe nefas iaculum temptante lacerto.
80
Maior cura duces miscendis abstrahit armis:
Pompeium exhaustae praebenda ad gramina terrae,
Quae currens obtriuit eques; gradibusque citatis
Vngula frondentem discussit cornea campum.
Belliger attonsis sonipes defessus in aruis,
85
Aduectos cum plena ferant praesepia culmos,
Ore nouas poscens moribundus labitur herbas
Et tremulo medios abrumpit poplite gyros.
Corpora dum soluit tabes et digerit artus,
Traxit iners caelum fluidae contagia pestis
90
Obscuram in nubem. Tali spiramine Nesis
Emittit Stygium nebulosis aera saxis,
Antraque letiferi rabiem Typhonis anhelant.
Inde labant populi, caeloque paratior unda
Omne pati uirus durauit uiscera caeno.
95
Iam riget atra cutis distentaque lumina rumpit,
Igneaque in uultus et sacro feruida morbo
Pestis abit, fessumque caput se ferre recusat.
Iam magis atque magis praeceps agit omnia fatum,
Nec medii dirimunt morbi uitamque necemque,
100
Sed languor cum morte uenit, turbaque cadentum
Aucta lues, dum mixta iacent incondita uiuis
Corpora; nam miseros ultra tentoria ciues
Spargere funus erat. Tamen hos minuere labores
A tergo pelagus pulsusque aquilonibus aer
105
Litoraque et plenae peregrina messe carinae.
At liber terrae spatiosis collibus hostis
Aere non pigro nec inertibus angitur undis,
Sed patitur saeuam, ueluti circumdatus arta
Obsidione, famem. Nondum turgentibus altam
110
In segetem culmis cernit miserabile uulgus
In pecudum cecidisse cibos et carpere dumos
Et foliis spoliare nemus letumque minantis
Vellere ab ignotis dubias radicibus herbas;
Quae mollire queunt flamma, quae frangere morsu
115
Quaeque per abrasas utero demittere fauces,
Plurimaque humanis ante hoc incognita mensis
Diripiens miles saturum tamen obsidet hostem.
Vt primum libuit ruptis euadere claustris
Pompeio cunctasque sibi permittere terras,
120
Non obscura petit latebrosae tempora noctis
Et raptum furto soceri cessantibus armis
Dedignatur iter: latis exire ruinis
Quaerit et impulso turres confringere uallo
Perque omnis gladios et qua uia caede paranda est.
125
Opportuna tamen ualli pars uisa propinqui,
Qua Minuci castella uacant et confraga densis
Arboribus dumeta tegunt. Hic puluere nullo
Proditus agmen agit subitusque in moenia uenit.
Tot simul e campis Latiae fulsere uolucres,
130
Tot cecinere tubae. Ne quid uictoria ferro
Deberet, pauor attonitos confecerat hostes.
Quod solum ualuit uirtus, iacuere perempti,
Debuerant quo stare loco; qui uulnera ferrent,
Iam derant, et nimbus agens tot tela peribat.
135
Tum piceos uoluunt immissae lampades ignes,
Tum quassae nutant turres lapsumque minantur.
Roboris impacti crebros uomit agger ad ictus.
Iam Pompeianae celsi super ardua ualli
Exierant aquilae, iam mundi iura patebant:
140
Quem non mille simul turmis nec Caesare toto
Auferret Fortuna locum, uictoribus unus
Eripuit uetuitque capi seque arma tenente
Ac nondum strato Magnum uicisse negauit.
Scaeua uiro nomen; castrorum in plebe merebat
145
Ante feras Rhodani gentes; ibi sanguine multo
Promotus Latiam longo gerit ordine uitem;
Pronus ad omne nefas et qui nesciret, in armis
Quam magnum uirtus crimen ciuilibus esset.
Hic ubi quaerentis socios iam Marte relicto
150
Tuta fugae cernit: "Quo uos pauor" inquit "adegit
Impius et cunctis ignotus Caesaris armis?
O famuli turpes, seruum pecus, absque cruore
Terga datis morti? Cumulo uos desse uirorum
Non pudet et bustis interque cadauera quaeri?
155
Non ira saltem, iuuenes, pietate remota
Stabitis? E cunctis, per quos erumperet hostis,
Nos sumus electi. non paruo sanguine Magni
Iste dies ierit. Peterem felicior umbras
Caesaris in uultu; testem hunc Fortuna negauit:
160
Pompeio laudante cadam. Confringite tela
Pectoris impulsu iugulisque retundite ferrum.
Iam longinqua petit puluis sonitusque ruinae,
Securasque fragor concussit Caesaris aures.
Vicimus, o socii; ueniet qui uindicet arces,
165
Dum morimur." Mouit tantum uox illa furorem
Quantum non primo succendunt classica cantu,
Mirantesque uirum atque auidi spectare sequuntur
Scituri iuuenes, numero deprensa locoque
An plus quam mortem uirtus daret. Ille ruenti
170
Aggere consistit primumque cadauera plenis
Turribus euoluit subeuntisque obruit hostis
Corporibus; totaeque uiro dant tela ruinae
Roboraque et moles, hosti seque ipse minatur.
Nunc sude, nunc duro contraria pectora conto
175
Detrudit muris et ualli summa tenentis
Amputat ense manus; caput obterit ossaque saxo
Ac male defensum fragili compage cerebrum
Dissipat; alterius flamma crinesque genasque
Succendit; strident oculis ardentibus ignes.
180
Vt primum cumulo crescente cadauera murum
Admouere solo, non segnior extulit illum
Saltus et in medias iecit super arma cateruas,
Quam per summa rapit celerem uenabula pardum.
Tunc densos inter cuneos compressus et omni
185
Vallatus bello uincit, quem respicit, hostem.
Iamque hebes et crasso non asper sanguine mucro;
Percussum Scaeuae frangit, non uulnerat hostem
Perdidit ensis opus, frangit sine uulnere membra.
Illum tota premit moles, illum omnia tela.
190
Nulla fuit non certa manus, non lancea felix,
Parque nouum Fortuna uidet concurrere, bellum
Atque uirum. Fortis crebris sonat ictibus umbo,
Et galeae fragmenta cauae compressa perurunt
Tempora, nec quidquam nudis uitalibus obstat
195
Iam praeter stantis in summis ossibus hastas.
Quid nunc, uaesani, iaculis leuibusue sagittis
Perditis haesuros numquam uitalibus ictus?
Hunc aut tortilibus uibrata falarica neruis
Obruat aut uasti muralia pondera saxi;
200
Hunc aries ferro ballistaque limite torta
Promoueat. Stat non fragilis pro Caesare murus
Pompeiumque tenet; iam pectora non tegit armis,
Ac ueritus credi clipeo laeuaque uacasse
Aut culpa uixisse sua, tot uulnera belli
205
Solus obit densamque ferens in pectore siluam
Iam gradibus fessis, in quem cadat, eligit hostem.
Par pelagi monstris, Libycae sic belua terrae
Sic Libycus densis elephans oppressus ab armis
Omne repercussum squalenti missile tergo
210
Frangit et haerentis mota cute discutit hastas;
Viscera tuta latent penitus, citraque cruorem
Confixae stant tela ferae; tot facta sagittis,
Tot iaculis unam non explent uulnera mortem.
Dictaea procul ecce manu Gortynis harundo
215
Tenditur in Scaeuam, quae uoto certior omni
In caput atque oculi laeuum descendit in orbem.
Ille moras ferri neruorum et uincula rumpit
Affixam uellens oculo pendente sagittam
Intrepidus telumque suo cum lumine calcat.
220
Pannonis haud aliter post ictum saeuior ursa,
Cum iaculum parua Libys amentauit habena,
Se rotat in uulnus telumque irata receptum
Impetit et secum fugientem circumit hastam.
Perdiderat uultum rabies; stetit imbre cruento
225
Informis facie. Laetus fragor aethera pulsat
Victorum; maiora uiris e sanguine paruo
Gaudia non faceret conspectum in Caesare uulnus.
Ille tegens alta suppressum mente furorem
Mitis et a uultu penitus uirtute remota
230
"Parcite" ait "ciues; procul hinc auertite ferrum,
Collatura meae nil sunt iam uulnera morti:
Non eget ingestis, sed uulsis pectore telis.
Tollite et in Magni uiuentem ponite castris;
Hoc uestro praestate duci; sit Scaeua relicti
235
Caesaris exemplum potius quam mortis honestae."
Credidit infelix simulatis uocibus Aulus
Nec uidit recto gladium mucrone trementem
Membraque captiui pariter laturus et arma
Fulmineum mediis excepit faucibus ensem.
240
Incaluit uirtus atque una caede refectus
"Soluat" ait "poenas, Scaeuam quicumque subactum
Sperauit; pacem gladio si quaerit ab isto
Magnus, adorato summittat Caesare signa.
An similem uestri segnemque ad fata putatis?
245
Pompei uobis minor est causaeque senatus
Quam mihi mortis amor." Simul haec effatur, et altus
Caesareas puluis testatur adesse cohortes.
Dedecus hic belli Magno crimenque remisit,
Ne solum totae fugerent te, Scaeua, cateruae.
250
Subducto qui Marte ruis: nam sanguine fuso
Vires pugna dabat. Labentem turba suorum
Excipit atque umeris defectum imponere gaudet.
Ac uelut inclusum perfosso in pectore numen
Et uiuam magnae speciem Virtutis adorant
255
Telaque confixis certant euellere membris
Exornantque deos ac nudum pectore Martem
Armis, Scaeua, tuis, felix hoc nomine famae,
Si tibi durus Hiber aut si tibi terga dedisset
Cantaber exiguis aut longis Teutonus armis.
260
Non tu bellorum spoliis ornare Tonantis
Templa potes, non tu laetis ululare triumphis.
Infelix, quanta dominum uirtute parasti!
Non magis hac Magnus castrorum parte repulsus
Intra claustra piger dilato Marte quieuit,
265
Quam mare lassatur, cum se tollentibus euris
Frangentem fluctus scopulum ferit aut latus alti
Montis adest seramque sibi parat unda ruinam.
Hinc uicina petens placido castella profundo
Incursu gemini Martis rapit armaque late
270
Spargit et effuso laxat tentoria campo,
Mutandaeque iuuat permissa licentia terrae.
Sic pleno Padus ore tumens super aggere tutas
Excurrit ripas et totos concutit agros,
Succubuit si qua tellus cumuloque furentem
275
Vndarum non passa ruit, tunc flumine toto
Transit et ignotos aperit sibi gurgite campos;
Illos terra fugit dominos, his rura colonis
Accedunt donante Pado. uix proelia Caesar
Senserat, elatus specula quae prodidit ignis:
280
Inuenit impulsos presso iam puluere muros,
Frigidaque ut ueteris deprendit signa ruinae;
Accendit pax ipsa loci mouitque furorem
Pompeiana quies et uicto Caesare somnus.
Ire uel in clades properat, dum gaudia turbet.
285
Torquato ruit inde minax, qui Caesaris arma
Segnius haud uidit quam malo nauta tremente
Omnia subducit Circaeae uela procellae,
Agminaque interius muro breuiore recepit,
Densius ut parua disponeret arma corona.
290
Transierat primi Caesar munimina ualli
Cum super e totis immisit collibus arma
Effuditque acies obsaeptum Magnus in hostem.
Non sic Aetnaeis habitans in uallibus horret
Enceladum, spirante noto, cum tota cauernas
295
Egerit et torrens in campos defluit Aetna,
Caesaris ut miles, glomerato puluere uictus
Ante aciem, caeci trepidus sub nube timoris,
Hostibus occurrit fugiens inque ipsa pauendo
Fata ruit. Totus mitti ciuilibus armis
300
Vsque uel in pacem potuit cruor: ipse furentis
Dux tenuit gladios. Felix ac libera legum,
Roma, fores iurisque tui, uicisset in illo
Si tibi Sulla loco. Dolet heu semperque dolebit
Quod scelerum, Caesar, prodest tibi summa tuorum,
305
Cum genero pugnasse pio. Pro tristia fata!
Non Vticae Libye clades, Hispania Mundae
Flesset et infando pollutus sanguine Nilus
Nobilius Phario gestasset rege cadauer,
Nec Iuba Marmaricas nudus pressisset harenas
310
Poenorumque umbras placasset sanguine fuso
Scipio, nec sancto caruisset uita Catone.
Vltimus esse dies potuit tibi, Roma, malorum,
Exire e mediis potuit Pharsalia fatis.
Deserit auerso possessam numine sedem
315
Caesar et Emathias lacero petit agmine terras.
Arma secuturum soceri quacumque fugasset
Temptauere suo comites deuertere Magnum
Hortatu, patrias sedes atque hoste carentem
Ausoniam peteret. "Numquam me Caesaris" inquit
320
"Exemplo reddam patria, numquamque uidebit
Me nisi dimisso redeuntem milite Roma.
Hesperiam potui motu surgente tenere,
Si uellem patriis aciem committere templis
Ac medio pugnare foro. Dum bella relegem,
325
Extremum Scythici transcendam frigoris orbem
Ardentesque plagas. Victor tibi, Roma, quietem
Eripiam, qui, ne premerent te proelia, fugi?
A potius, ne quid bello patiaris in isto,
Te Caesar putet esse suam." Sic fatus in ortus
330
Phoebeos condixit iter terraeque secutus
Deuia, qua uastos aperit Candauia saltus,
Contigit Emathiam, bello quam fata parabant.
Thessaliam, qua parte diem brumalibus horis
Attollit Titan, rupes Ossaea coercet;
335
Cum per summa poli Phoebum trahit altior aestas,
Pelion opponit radiis nascentibus umbras;
At medios ignes caeli rapidique Leonis
Solstitiale caput nemorosus summouet Othrys.
Excipit aduersos zephyros et Iapyga Pindus
340
Et maturato praecidit uespere lucem;
Nec metuens imi borean habitator Olympi
Lucentem totis ignorat noctibus Arcton.
Hos inter montis, media qui ualle premuntur,
Perpetuis quondam latuere paludibus agri,
345
Flumina dum campi retinent nec peruia Tempe
Dant aditus pelagi stagnumque implentibus unus
Crescere cursus erat. Postquam discessit Olympo
Herculea grauis Ossa manu subitaeque ruinam
Sensit aquae Nereus, melius mansura sub undis
350
Emathis aequorei regnum Pharsalos Achillis
Eminet et, prima Rhoeteia litora pinu
Quae tetigit, Phylace Pteleosque et Dorion ira
Flebile Pieridum, Trachin pretioque nefandae
Lampados Herculeis fortis Meliboea pharetris
355
Atque olim Larisa potens, ubi nobile quondam
Nunc super Argos arant, ueteres ubi fabula Thebas
Monstrat Echionias, ubi quondam Pentheos exul
Colla caputque ferens supremo tradidit igni
Questa, quod hoc solum nato rapuisset, Agaue.
360
Ergo abrupta palus multos discessit in amnes.
Purus in occasus, parui sed gurgitis, Aeas
Ionio fluit inde mari, nec fortior undis
Labitur auectae pater Isidis et tuus, Oeneu,
Paene gener crassis oblimat Echinadas undis,
365
Et Meleagream maculatus sanguine Nessi
Euenos Calydona secat. Ferit amne citato
Maliacas Spercheos aquas, et flumine puro
Irrigat Amphrysos famulantis pascua Phoebi,
Quique nec umentis nebulas nec rore madentem
370
Aera nec tenues uentos suspirat, Anauros,
Et quisquis pelago per se non cognitus amnis
Peneo donauit aquas. It gurgite rapto
Apidanos numquamque celer, nisi mixtus, Enipeus.
Accipit Asopos cursus Phoenixque Melasque.
375
Solus, in alterius nomen cum uenerit undae,
Defendit Titaresos aquas lapsusque superne
Gurgite Penei pro siccis utitur aruis;
Hunc fama est Stygiis manare paludibus amnem
Et capitis memorem fluuii contagia uilis
380
Nolle pati superumque sibi seruare timorem.
Vt primum emissis patuerunt amnibus arua,
Pinguis Bebrycio discessit uomere sulcus;
Mox Lelegum dextra pressum descendit aratrum;
Aeolidae Dolopesque solum fregere coloni
385
Et Magnetes equis, Minyae gens cognita remis.
Illic semiferos Ixionidas Centauros
Feta Pelethroniis nubes effudit in antris:
Aspera te Pholoes frangentem, Monyche, saxa,
Teque sub Oetaeo torquentem uertice uulsas,
390
Rhoete ferox, quas uix boreas inuerteret, ornos,
Hospes et Alcidae magni, Phole, teque per amnem
Improbe Lernaeas uector passure sagittas,
Teque, senex Chiron, gelido qui sidere fulgens
Impetis Haemonio maiorem Scorpion arcu.
395
Hac tellure feri micuerunt semina Martis.
Primus ab aequorea percussis cuspide saxis
Thessalicus sonipes, bellis feralibus omen,
Exiluit, primus chalybem frenosque momordit
Spumauitque nouis Lapithae domitoris habenis.
400
Prima fretum scindens Pagasaeo litore pinus
Terrenum ignotas hominem proiecit in undas.
Primus Thessalicae rector telluris Ionos
In formam calidae percussit pondera massae,
Fudit et argentum flammis aurumque moneta
405
Fregit et immensis coxit fornacibus aera.
Illic quod populos scelerata impegit in arma,
Diuitias numerare datum est. Hinc maxima serpens
Descendit Python Cirrhaeaque fluxit in arua,
Vnde et Thessalicae ueniunt ad Pythia laurus.
410
Impius hinc prolem superis immisit Aloeus,
Inseruit celsis prope se cum Pelion astris
Sideribusque uias incurrens abstulit Ossa.
Hac ubi damnata fatis tellure locarunt
Castra duces, cunctos belli praesaga futuri
415
Mens agitat, summique grauem discriminis horam
Aduentare palam est, propius iam fata moueri.
Degeneres trepidant animi peioraque uersant;
Ad dubios pauci praesumpto robore casus
Spemque metumque ferunt. Turbae sed mixtus inerti
420
Sextus erat, Magno proles non digna parente,
Qui mox Scyllaeis exul grassatus in undis
Polluit aequoreos Siculus pirata triumphos.
Qui stimulante metu fati praenoscere cursus
Impatiensque morae uenturisque omnibus aeger
425
Non tripodas Deli, non Pythia consulit antra
Nec quaesisse libet, primis quid frugibus altrix
Aere Iouis Dodona sonet, quis noscere fibra
Fata queat, quis prodat aues, quis fulgura caeli
Seruet et Assyria scrutetur sidera cura,
430
Aut si quid tacitum, sed fas erat. Ille supernis
Detestanda deis saeuorum arcana magorum
Nouerat et tristis sacris feralibus aras,
Vmbrarum Ditisque fidem, miseroque liquebat
Scire parum superos. uanum saeuumque furorem
435
Adiuuat ipse locus uicinaque moenia castris
Haemonidum, ficti quas nulla licentia monstri
Transierit, quarum quidquid non creditur ars est.
Thessala quin etiam tellus herbasque nocentes
Rupibus ingenuit sensuraque saxa canentes
440
Arcanum ferale magos. Ibi plurima surgunt
Vim factura deis, et terris hospita Colchis
Legit in Haemoniis, quas non aduexerat, herbas.
Impia tot populis, tot surdas gentibus aures
Caelicolum dirae conuertunt carmina gentis.
445
Vna per aetherios exit uox illa recessus
Verbaque ad inuitum perfert cogentia numen,
Quod non cura poli caelique uolubilis umquam
Auocat. Infandum tetigit cum sidera murmur
Tunc Babylon Persea licet secretaque Memphis
450
Omne uetustorum soluat penetrale magorum,
Abducet superos alienis Thessalis aris.
Carmine Thessalidum dura in praecordia fluxit
Non fatis addictus amor, flammisque seueri
Illicitis arsere senes. nec noxia tantum
455
Pocula proficiunt aut cum turgentia suco
Frontis amaturae subducunt pignora fetae:
Mens hausti nulla sanie polluta ueneni
Excantata perit. Quos non concordia mixti
Alligat ulla tori blandaeque potentia formae,
460
Traxerunt torti magica uertigine fili.
Cessauere uices rerum, dilataque longa
Haesit nocte dies; legi non paruit aether,
Torpuit et praeceps audito carmine mundus,
Axibus et rapidis impulsos Iuppiter urgens
465
Miratur non ire polos. Nunc omnia complent
Imbribus et calido praeducunt nubila Phoebo
Et tonat ignaro caelum Ioue; uocibus isdem
Vmentis late nebulas nimbosque solutis
Excussere comis. uentis cessantibus aequor
470
Intumuit; rursus uetitum sentire procellas
Conticuit turbante noto, puppimque ferentes
In uentum tumuere sinus. De rupe pependit
Abscisa fixus torrens, amnisque cucurrit
Non qua pronus erat. Nilum non extulit aestas;
475
Maeander direxit aquas, Rhodanumque morantem
Praecipitauit Arar. Summisso uertice montes
Explicuere iugum; nubes suspexit Olympus,
Solibus et nullis Scythicae, cum bruma rigeret,
Dimaduere niues. impulsam sidere Tethyn
480
Reppulit Haemonium defenso litore carmen.
Terra quoque immoti concussit ponderis axes
Et medium uergens titubauit nisus in orbem.
Tantae molis onus percussum uoce recessit
Perspectumque dedit circumlabentis Olympi.
485
Omne potens animal leti genitumque nocere
Et pauet Haemonias et mortibus instruit artes.
Has auidae tigres et nobilis ira leonum
Ore fouent blando; gelidos his explicat orbes
Inque pruinoso coluber distenditur aruo.
490
Viperei coeunt abrupto corpore nodi
Humanoque cadit serpens afflata ueneno.
Quis labor hic superis cantus herbasque sequendi
Spernendique timor? cuius commercia pacti
Obstrictos habuere deos? parere necesse est
495
An iuuat? ignota tantum pietate merentur
An tacitis ualuere minis? hoc iuris in omnis
Est illis superos, an habent haec carmina certum
Imperiosa deum qui mundum cogere, quidquid
Cogitur ipse, potest? Illis et sidera primum
500
Praecipiti deducta polo, Phoebeque serena
Non aliter diris uerborum obsessa uenenis
Palluit et nigris terrenisque ignibus arsit,
Quam si fraterna prohiberet imagine tellus
Insereretque suas flammis caelestibus umbras,
505
Et patitur tantos cantu depressa labores
Donec suppositas propior despumet in herbas.
Hos scelerum ritus, haec dirae carmina gentis
Effera damnarat nimiae pietatis Erictho
Inque nouos ritus pollutam duxerat artem.
510
Illi namque nefas urbis summittere tecto
Aut laribus ferale caput desertaque busta
Incolit et tumulos expulsis obtinet umbris
Grata deis Erebi. coetus audire silentum,
Nosse domos Stygias arcanaque Ditis operti
515
Non superi, non uita uetat. Tenet ora profanae
Foeda situ macies, caeloque ignota sereno
Terribilis Stygio facies pallore grauatur
Impexis onerata comis; si nimbus et atrae
Sidera subducunt nubes, tunc Thessala nudis
520
Egreditur bustis nocturnaque fulmina captat.
Semina fecundae segetis calcata perussit
Et non letiferas spirando perdidit auras.
Nec superos orat nec cantu supplice numen
Auxiliare uocat nec fibras illa litantis
525
Nouit; funereas aris imponere flammas
Gaudet et accenso rapuit quae tura sepulchro.
Omne nefas superi prima iam uoce precantis
Concedunt carmenque timent audire secundum.
Viuentes animas et adhuc sua membra regentes
530
Infodit busto, fatis debentibus annos
Mors inuita subit, peruersa funera pompa
Rettulit a tumulis, fugere cadauera lectum.
Fumantis iuuenum cineres ardentiaque ossa
E mediis rapit illa rogis ipsamque, parentes
535
Quam tenuere, facem nigroque uolantia fumo
Feralis fragmenta tori, uestesque fluentes
Colligit in cineres et olentis membra fauillas.
Ast ubi seruantur saxis, quibus intimus umor
Ducitur, et tracta durescunt tabe medullae
540
Corpora, tunc omnis auide desaeuit in artus
Immergitque manus oculis gaudetque gelatos
Effodisse orbes et siccae pallida rodit
Excrementa manus. Laqueum nodosque nocentis
Ore suo rumpit, pendentia corpora carpsit
545
Abrasitque cruces percussaque uiscera nimbis
Vulsit et incoctas admisso sole medullas.
Insertum manibus chalybem nigramque per artus
Stillantis tabi saniem uirusque coactum
Sustulit et neruo morsus retinente pependit.
550
Et quodcumque iacet nuda tellure cadauer,
Ante feras uolucresque sedet nec carpere membra
Vult ferro manibusque suis morsusque luporum
Exspectat siccis raptura e faucibus artus.
Nec cessant a caede manus, si sanguine uiuo
555
Est opus, erumpat iugulo qui primus aperto,
Nec refugit caedes, uiuum si sacra cruorem
Extaque funereae poscunt trepidantia mensae;
Vulnere sic uentris, non qua natura uocabat,
Extrahitur partus calidis ponendus in aris;
560
Et quotiens saeuis opus est ac fortibus umbris,
Ipsa facit manes: hominum mors omnis in usu est.
Illa genae florem primaeuo corpore uulsit,
Illa comam laeua morienti abscidit ephebo.
Saepe etiam caris cognato in funere dira
565
Thessalis incubuit membris atque oscula figens
Truncauitque caput compressaque dentibus ora
Laxauit siccoque haerentem gutture linguam
Praemordens gelidis infundit murmura labris
Arcanumque nefas Stygias mandauit ad umbras.
570
Hanc ut fama loci Pompeio prodidit, alta
Nocte poli, Titan medium quo tempore ducit
Sub nostra tellure diem, deserta per arua
Carpit iter. fidi scelerum suetique ministri
Effractos circum tumulos ac busta uagati
575
Conspexere procul praerupta in caute sedentem,
Qua iuga deuexus Pharsalica porrigit Haemus.
Illa magis magicisque deis incognita uerba
Temptabat carmenque nouos fingebat in usus.
Namque timens ne Mars alium uagus iret in orbem
580
Emathis et tellus tam multa caede careret,
Pollutos cantu dirisque uenefica sucis
Conspersos uetuit transmittere bella Philippos,
Tot mortes habitura suas usuraque mundi
Sanguine; caesorum truncare cadauera regum
585
Sperat et Hesperiae cineres auertere gentis
Ossaque nobilium tantosque acquirere manes.
Hic ardor solusque labor, quid corpore Magni
Proiecto rapiat, quos Caesaris inuolet artus.
Quam prior affatur Pompei ignaua propago
590
"O decus Haemonidum, populis quae pandere fata
Quaeque suo uentura potes deuertere cursu,
Te precor, ut certum liceat mihi noscere finem,
Quem belli fortuna paret. Non ultima turbae
Pars ego Romanae, Magni clarissima proles,
595
Vel dominus rerum uel tanti funeris heres.
Mens dubiis percussa pauet rursusque parata est
Certos ferre metus; hoc casibus eripe iuris,
Ne subiti caecique ruant. uel numina torque
Vel tu parce deis et manibus exprime uerum.
600
Elysias resera sedes ipsamque uocatam,
Quos petat e nobis, Mortem mihi coge fateri.
Non humilis labor est; dignum quod quaerere cures
Vel tibi quo tanti praeponderet alea fati."
Impia laetatur uulgatae nomine famae
605
Thessalis et contra: "Si fata minora moueres,
Pronum erat, o iuuenis, quos uelles" inquit "in actus
Inuitos praebere deos. Conceditur arti,
Vnam cum radiis presserunt sidera mortem,
Inseruisse moras, et quamuis fecerit omnis
610
Stella senem, medios herbis praerumpimus annos.
At simul a prima descendit origine mundi
Causarum series atque omnia fata laborant
Si quicquam mutare uelis, unoque sub ictu
Stat genus humanum, tunc (Thessala turba fatemur)
615
Plus Fortuna potest. Sed si praenoscere casus
Contentus, facilesque aditus multique patebunt
Ad uerum: tellus nobis aetherque chaosque
Aequoraque et campi Rhodopeaque saxa loquentur.
Sed pronum, cum tanta nouae sit copia mortis,
620
Emathiis unum campis attollere corpus,
Vt modo defuncti tepidique cadaueris ora
Plena uoce sonent nec membris sole perustis
Auribus incertum feralis strideat umbra."
Dixerat et noctis geminatis arte tenebris
625
Maestum tecta caput squalenti nube pererrat
Corpora caesorum tumulis proiecta negatis.
Continuo fugere lupi, fugere reuulsis
Vnguibus impastae uolucres, dum Thessala uatem
Eligit et gelidas leto scrutata medullas
630
Pulmonis rigidi stantis sine uulnere fibras
Inuenit et uocem defuncto in corpore quaerit.
Fata peremptorum pendent iam multa uirorum,
Quem superis reuocasse uelit. Si tollere totas
Temptasset campis acies et reddere bello,
635
Cessissent leges Erebi, monstroque potenti
Extractus Stygio populus pugnasset Auerno.
Electum tandem traiecto gutture corpus
Ducit, et inserto laqueis feralibus unco
Per scopulos miserum trahitur, per saxa cadauer
640
Victurum montisque caui, quem tristis Erictho
Damnarat sacris, alta sub rupe locatur.
Haud procul a Ditis caecis depressa cauernis
In praeceps subsedit humus, quam pallida pronis
Vrget silua comis et nullo uertice caelum
645
Suspiciens Phoebo non peruia taxus opacat.
Marcentes intus tenebrae pallensque sub antris
Longa nocte situs numquam nisi carmine factum
Lumen habet. Non Taenariis sic faucibus aer
Sedit iners, maestum mundi confine latentis
650
Ac nostri, quo non metuant admittere manes
Tartarei reges. nam quamuis Thessala uates
Vim faciat fatis, dubium est, quod traxerit illuc,
Aspiciat Stygias, an quod descenderit, umbras.
Discolor et uario furialis cultus amictu
655
Induitur, uultusque aperitur crine remoto
Et coma uipereis substringitur horrida sertis.
Vt pauidos iuuenis comites ipsumque trementem
Conspicit exanimi defixum lumina uultu:
"Ponite" ait "trepida conceptos mente timores.
660
Iam noua, iam uera reddetur uita figura,
Vt quamuis pauidi possint audire loquentem.
Si uero Stygiosque lacus ripamque sonantem
Ignibus ostendam, si me praesente uideri
Eumenides possint uillosaque colla colubris
665
Cerberus excutiens et uincti terga gigantes?
Quis timor, ignaui, metuentis cernere manes?"
Pectora tunc primum feruenti sanguine supplet
Vulneribus laxata nouis taboque medullas
Abluit et uirus large lunare ministrat.
670
Huc quicquid fetu genuit natura sinistro
Miscetur. Non spuma canum, quibus unda timori est
Viscera non lyncis, non durae nodus hyaenae
Defuit et cerui pastae serpente medullae,
Non puppim retinens euro tendente rudentis
675
In mediis echenais aquis oculique draconum
Quaeque sonant feta tepefacta sub alite saxa;
Non Arabum uolucer serpens innataque rubris
Aequoribus custos pretiosae uipera conchae
Aut uiuentis adhuc Libyci membrana cerastae
680
Aut cinis eoa positi phoenicis in ara.
Quo postquam uiles et habentis nomina pestis
Contulit, infando saturatas carmine frondis
Et, quibus os dirum nascentibus inspuit, herbas
Addidit et quicquid mundo dedit ipsa ueneni.
685
Tum uox Lethaeos cunctis pollentior herbis
Excantare deos confundit murmura primum
Dissona et humanae multum discordia linguae.
Latratus habet illa canum gemitusque luporum,
Quod trepidus bubo, quod strix nocturna queruntur,
690
Quod strident ululantque ferae, quod sibilat anguis;
Exprimit et planctus illisae cautibus undae
Siluarumque sonum fractaeque tonitrua nubis.
Tot rerum uox una fuit. Mox cetera cantu
Explicat Haemonio penetratque in Tartara lingua:
695
"Eumenides Stygiumque nefas Poenaeque nocentum
Et Chaos innumeros auidum confundere mundos
Et rector terrae, quem longa in saecula torquet
Mors dilata deum, Styx, et, quos nulla meretur
Thessalis, Elysios, caelum matremque perosa
700
Persephone nostraeque Hecates pars ultima, per quam
Manibus et mihi sunt tacitae commercia linguae,
Ianitor et sedis laxae, qui uiscera saeuo
Spargis nostra cani repetitaque fila sorores
Tracturae tuque o flagrantis portitor undae,
705
Iam lassate senex ad me redeuntibus umbris,
Exaudite preces; si uos satis ore nefando
Pollutoque uoco, si numquam haec carmina fibris
Humanis ieiuna cano, si pectora plena
Saepe dedi, laui calido prosecta cerebro,
710
Si quisquis uestris caput extaque lancibus infans
Imposuit uicturus erat, parete precanti.
Non in Tartareo latitantem poscimus antro
Adsuetamque diu tenebris, modo luce fugata
Descendentem animam; primo pallentis hiatu
715
Haeret adhuc Orci, licet has exaudiat herbas
Ad manes uentura semel. Ducis omina nato
Pompeiana canat nostri modo militis umbra,
Si bene de uobis ciuilia bella merentur."
Haec ubi fata caput spumantiaque ora leuauit,
720
Aspicit astantem proiecti corporis umbram
Exanimes artus inuisaque claustra timentem
Carceris antiqui. Pauet ire in pectus apertum
Visceraque et ruptas letali uulnere fibras.
A miser extremum cui mortis munus inique
725
Eripitur, non posse mori. Miratur Erictho
Has fatis licuisse moras, irataque Morti
Verberat immotum uiuo serpente cadauer
Perque cauas terrae, quas egit carmine, rimas
Manibus illatrat regnique silentia rumpit:
730
"Tisiphone uocisque meae secura Megaera,
Non agitis saeuis Erebi per inane flagellis
Infelicem animam? iam uos ego nomine uero
Eliciam Stygiasque canes in luce superna
Destituam; per busta sequar, per funera custos;
735
Expellam tumulis, abigam uos omnibus urnis.
Teque deis, ad quos alio procedere uultu
Ficta soles, Hecate, pallenti tabida forma,
Ostendam faciemque Erebi mutare uetabo.
Eloquar, immenso terrae sub pondere quae te
740
Contineant, Hennaea, dapes, quo foedere maestum
Regem noctis ames, quae te contagia passam
Noluerit reuocare Ceres. Tibi, pessime mundi
Arbiter, immittam ruptis Titana cauernis,
Et subito feriere die. Paretis, an ille
745
Compellandus erit, quo numquam terra uocato
Non concussa tremit, qui Gorgona cernit apertam
Verberibusque suis trepidam castigat Erinyn,
Indespecta tenet uobis qui Tartara, cuius
Vos estis superi, Stygias qui peierat undas?"
750
Protinus astrictus caluit cruor atraque fouit
Vulnera et in uenas extremaque membra cucurrit.
Percussae gelido trepidant sub pectore fibrae,
Et noua desuetis surrepens uita medullis
Miscetur morti. Tunc omnis palpitat artus,
755
Tenduntur nerui; nec se tellure cadauer
Paulatim per membra leuat terraque repulsum est
Erectumque semel. Distento lumina rictu
Nudantur. Nondum facies uiuentis in illo,
Iam morientis erat; remanet pallorque rigorque,
760
Et stupet illatus mundo. sed murmure nullo
Ora astricta sonant: uox illi linguaque tantum
Responsura datur. "Dic" inquit Thessala "magna,
Quod iubeo, mercede mihi; nam uera locutum
Immunem toto mundi praestabimus aeuo
765
Artibus Haemoniis; tali tua membra sepulchro,
Talibus exuram Stygio cum carmine siluis,
Vt nullos cantata magos exaudiat umbra.
Sit tanti uixisse iterum, nec uerba nec herbae
Audebunt longae somnum tibi soluere Lethes
770
A me morte data. Tripodas uatesque deorum
Sors obscura decet: certus discedat, ab umbris
Quisquis uera petit duraeque oracula Mortis
Fortis adit. Ne parce, precor: da nomina rebus,
Da loca, da uocem, qua mecum fata loquantur".
775
Addidit et carmen quo quicquid consulit umbram
Scire dedit. maestum fletu manante cadauer:
"Tristia non equidem Parcarum stamina" dixit
"Aspexi tactae reuocatus ab aggere ripae;
Quod tamen e cunctis mihi noscere contigit umbris,
780
Effera Romanos agitat discordia manes
Impiaque infernam ruperunt arma quietem.
Elysias alii sedes ac Tartara maesta
Diuersi liquere duces; quid fata pararent
Hi fecere palam. Tristis felicibus umbris
785
Vultus erat; uidi Decios, natumque patremque,
Lustrales bellis animas, flentemque Camillum
Et Curios, Sullam de te, Fortuna, querentem;
Deplorat Libycis perituram Scipio terris
Infaustam subolem; maior Carthaginis hostis
790
Non seruituri maeret Cato fata nepotis;
Solum te, consul depulsis prime tyrannis,
Brute, pias inter gaudentem uidimus umbras.
Abruptis Catilina minax fractisque catenis
Exultat Mariique truces nudique Cethegi;
795
Vidi ego laetantis, popularia nomina, Drusos
Legibus immodicos ausosque ingentia Gracchos;
Aeternis chalibis nodis et carcere Ditis
Constrictae plausere manus, camposque piorum
Poscit turba nocens. Regni possessor inertis
800
Pallentis aperit sedes abruptaque saxa
Asperat et durum uinclis adamanta paratque
Poenam uictori. Refer haec solacia tecum,
O iuuenis, placido manes patremque domumque
Exspectare sinu regnique in parte serena
805
Pompeis seruare locum. Nec gloria paruae
Sollicitet uitae: ueniet quae misceat omnis
Hora duces. Properate mori magnoque superbi
Quamuis e paruis animo descendite bustis
Et Romanorum manes calcate deorum.
810
Quem tumulum Nili, quem Thybridis alluat unda,
Quaeritur; et ducibus tantum de funere pugna.
Tu fatum ne quaere tuum: cognoscere Parcae
Me reticente dabunt; tibi certior omnia uates
Ipse canet Siculis genitor Pompeius in aruis,
815
Ille quoque, incertus quo te uocet, unde repellat,
Quas iubeat uitare plagas, quae sidera mundi.
Europam, miseri, Libyamque Asiamque timete:
Distribuit tumulos uestris Fortuna triumphis.
O miseranda domus, toto nil orbe uidebis
820
Tutius Emathia". Sic postquam fata peregit,
Stat uultu maestus tacito mortemque reposcit.
Carminibus magicis opus est herbisque, cadauer
Vt cadat, et nequeunt animam sibi reddere fata
Consumpto iam iure semel. Tunc robore multo
825
Extruit illa rogum; uenit defunctus ad ignes.
Accensa iuuenem positum strue liquit Erictho,
Tandem passa mori, Sextoque ad castra parentis
It comes, et caelo lucis ducente colorem,
Dum ferrent tutos intra tentoria gressus
830
Iussa tenere diem, densas nox praestitit umbras.