Asinus et leo uenantes
Virtutis expers, uerbis iactans gloriam,
Ignotos fallit, notis est derisui.
Venari asello comite cum uellet leo,
Contexit illum frutice et admonuit simul
5
Vt insueta uoce terreret feras,
Fugientes ipse exciperet. Hic auritulus
Clamorem subito totis tollit uiribus
Nouoque turbat bestias miraculo.
Quae dum pauentes exitus notos petunt,
10
Leonis adfliguntur horrendo impetu.
Qui postquam caede fessus est, asinum euocat
Iubetque uocem premere. Tunc ille insolens:
"Qualis uidetur opera tibi uocis meae?"
"Insignis" inquit "sic ut, nisi nossem tuum
15
Animum genusque, simili fugissem metu."