Dona cano diuum, laetas uenantibus artis,
Auspicio, Diana, tuo; prius omnis in armis
Spes fuit et nuda siluas uirtute mouebant
Inconsulti homines uitaque erat error in omni.
5
Post alia, propiore, uia meliusque profecti
Te sociam, Ratio, rebus sumpsere gerendis;
Hinc omne auxilium uitae rectusque reluxit
Ordo et contiguas didicere ex artibus artis
Proserere, hinc demens cecidit uiolentia retro.
10
Sed primum auspicium deus artibus altaque circa
Firmamenta dedit; tum partis quisque secutus
Exegere suas tetigitque industria finem.
Tu trepidam bello, uitam, Diana, ferino
Qua primam quaerebat opem, dignata repertis
15
Protegere auxiliis orbemque hac soluere noxa.
Asciuere tuo comites sub nomine diuae
Centum: omnes nemorum, umentes de fontibus omnes
Naides, et Latii satyri Faunusque subibant
Maenaliusque puer, domitrixque Idaea leonum
20
Mater, et inculto Siluanus termite gaudens.
His ego praesidibus nostram defendere sortem
Contra mille feras et non sine carmine iussus
Carmine et arma dabo et uenandi persequar artis.
Armorum casses, plagiique exordia, restes,
25
Prima iubent tenui nascentem iungere filo
Limbum et quadruplicis tormento astringere limbos:
Illa operum patiens, illa usus linea longi
Tunc ipsum e medio cassem quo nascitur ore
Per senos circum usque sinus laqueabis, ut omni
30
Concipiat tergo, si quisquam est plurimus, hostem.
At bis uicenos spatium praetendere passus
Rete uelim plenisque decem consurgere nodis;
Ingrati maiora sinus impendia sument.
Optuma Cinyphiae, ne quid cunctere, paludes
35
Lina dabunt; bonus Aeolia de ualle Sibyllae
Fetus et aprico Tuscorum stuppea campo
Messis contiguum sorbens de flumine rorem,
Qua cultor Latii per opaca silentia Thybris
Labitur inque sinus magno uenit ore marinos.
40
At contra nostris imbellia lina Faliscis
Hispanique alio spectantur Saetabis usu.
Vix operata suo sacra ad Bubastia lino
Velatur sonipes aestiui turba Canopi:
Ipse in materia damnosus candor inerti
45
Ostendit longe fraudem atque exterruit hostis.
At pauper rigui custos Alabandius horti
Cannabinas nutrit siluas, quam commoda nostro
Armamenta operi. grauis est tutela, sed illis
Tu licet Haemonios includas retibus ursos.
50
Tantum ne subeat uitiorum pessimus umor
Ante caue: non est umentibus usus in armis,
Nulla fides. ergo seu pressa flumina ualle
Inter opus clausaeque malum fecere paludes,
Siue improuisus caelo perfuderit imber,
55
Illa uel ad flatus Helices oppande serenae
Vel caligineo laxanda reponite fumo.
Idcirco et primas linorum tangere messes
Ante uetant quam maturis accenderit annum
Ignibus et claro Plias se prompserit ortu.
60
Imbiberit: tanto respondet longior usus.
Magnum opus et tangi, nisi cura uincitur, impar.
Nonne uides ueterum, quos prodit fabula rerum,
Semideos -illi aggeribus temptare superbis
Caeli iter et matres ausi attrectare deorum-
65
Quam magna mercede meo sine munere siluas
Impulerint? flet adhuc et porro flebit Adonin
Victa Venus, ceciditque suis Ancaeus in aruis
(Et praedexter erat, geminisque securibus ingens)
Ipse deus cultorque feri Tirynthius orbis,
70
Quem mare, quem tellus, quem praeceps ianua Ditis
Omnia temptantem, qua laus erat obuia, passa
Hinc decus et famae primum impetrauit honorem.
Exige si qua meis respondet ab artibus ergo
Gratia quae uires fallat collata ferinas:
75
Sunt quibus immundo decerptae uulture plumae
Instrumentum operis fuit et non parua facultas.
Tantum inter niuei iungantur uellera cygni,
Et satis armorum est. haec clara luce coruscant
Terribiles species, at uulture dirus ab atro
80
Turbat odor siluas meliusque alterna ualet res.
Sed quam clara tuis et pinguis pluma sub armis,
Tam mollis tactu et non sit creberruma nexu,
Ne reprensa suis properantem linea pennis
Implicet atque ipso mendosa coarguat usu.
85
Hic magis in ceruos ualuit metus; ast ubi lentae
Interdum Libyco fucantur sandyce pennae
Linteaque expositis lucent anconibus arma,
Rarum si qua metus eludet belua falsos.
Nam fuit et laqueis aliquis curracibus usus:
90
Ceruino iussere magis contexere neruo;
Fraus teget insidias habitu mentita ferino.
Quid qui dentatas iligno robore clausit
Venator pedicas, quam dissimulantibus armis
Saepe habet imprudens alieni lucra laboris!
95
O felix, tantis quem primum industria rebus
Prodidit auctorem! deus ille an proxuma diuos
Mens fuit, in caecas aciem quae magna tenebras
Egit et ignarum perfudit lumine uulgus?
Dic age Pierio (fas est) Diana, ministro.
100
Arcadium stat fama senem, quem Maenalus auctor
Et Lacedaemoniae primum uidistis Amyclae
Per non adsuetas metantem retia ualles
Dercylon. haut illo quisquam se iustior egit,
Hau fuit in terris diuum obseruantior alter:
105
Ergo illum primis nemorum dea finxit in aruis
Auctoremque operi dignata inscribere magno
Iussit adire suas et pandere gentibus artes.
Ille etiam ualido primus uenabula dente
Induit et proni moderatus uulneris iram
110
Omne moris excepit onus; tum stricta uerutis
Dentibus et gemina subiere hastilia furca
Et quidam totis clauserunt ensibus hastas,
Ne cessaret iners in uulnere massa ferino.
Blandimenta uagae fugies nouitatis: ibidem
115
Exiguo nimioue nocent. sed lubricus errat
Mos et ab expertis festinant usibus omnes.
Quid, Macetum immensos libeat si dicere contos?
Quam longa exigui spicant hastilia dentes!
Aut contra ut tenero destrictas cortice uirgas
120
Praegrauat ingenti pernix Lucania cultro!
Omnia tela modi melius finxere salubres,
Quocirca et iaculis habilem perpendimus usum:
Neu leue uulnus eat neu sit breuis impetus illi.
Ipsa arcu Lyciaque suos Diana pharetra
125
Armauit comites: ne tela relinquite diuae:
Magnum opus et uolucres quondam fecere sagittae.
Disce agedum et ualidis dilectum hastilibus omnem.
Plurima Threiciis nutritur uallibus Hebri
Cornus et umbrosae Veneris per litora myrtus
130
Taxique pinusque Altinatesque genestae
Et magis incomptos opera iuturus agrestis
Termes. ab Eois descendit uirga Sabaeis
Mater odorati multum pulcherruma turis:
Illa suos usus intractatumque decorem
135
(Sic nemorum iussere deae) natalibus hausit
Arbitriis; at enim multo sunt ficta labore
Cetera quae siluis errant hastilia nostris:
Nunquam sponte sua procerus ad aethera termes
Exiit inque ipsa curuantur stirpe genestae.
140
Ergo age luxuriam primo fetusque nocentis
Detrahe: frondosas grauat indulgentia siluas.
Post ubi proceris generosa stirpibus arbor
Se dederit teretisque ferent ad sidera uirgae,
Stringe notas circum et gemmantis exige uersus.
145
His, si quis uitium nociturus sufficit, umor
Vlceribus fluet et uenas durabit inertis.
In quinos sublata pedes hastilia plena
Caede manu, dum pomiferis aduertitur annus
Frondibus et tepidos autumnus continet imbres.
150
Sed cur exiguis tantos in partibus orbes
Lustramus? prima illa canum, non ulla per artis
Cura prior, siue indomitos uehementior hostis
Nudo marte premas seu bellum ex arte ministres.
Mille canum patriae ductique ab origine mores
155
Quoique sua. magna indocilis dat proelia Medus
Magnaque diuersos extollit gloria Celtas.
Arma negant contra martemque odere Geloni,
Sed natura sagax: Perses in utroque paratus.
Sunt qui Seras alant, genus intractabilis irae;
160
At contra faciles magnique Lycaones armis.
Sed non Hyrcano satis est uehementia gentis
Tanta suae: petiere ultro fera semina siluis;
Dat uenus accessus et blando foedere iungit.
Tunc et mansuetis tuto ferus errat adulter
165
In stabulis ultroque grauem succedere tigrin
Ausa canis maiore tulit de sanguine fetum.
Sed praeceps uirtus: ipsa uenabitur aula
Ille tibi et pecudum multo cum sanguine crescet.
Pasce tamen: quaecunque domi sibi crimina fecit,
170
Excutiet silua magnus pugnator adepta.
At fugit aduersos idem quos repperit hostis
Vmber: quanta fides, utinam, et sollertia naris,
Tanta foret uirtus et tantum uellet in armis!
Quid, freta si Morinum dubio refluentia ponto
175
Veneris atque ipsos libeat penetrare Britannos?
O quanta est merces et quantum impendia supra,
Si non ad speciem mentiturosque decores
(Paruis haec una est catulis iactura Britannis),
At magnum cum uenit opus promendaque uirtus
180
Et uocat extremo praeceps discrimine mauors:
Non tunc egregios tantum admirere Molossos,
Comparat his uersuta suas Athamania ...
Azorusque Pheraeque et clandestinus Acarnan:
Sicut Acarnanes subierunt proelia furto,
185
Sic canis illa suos taciturna superuenit hostis.
At clangore citat quos nondum conspicit apros
Aetola quaecumque canis de stirpe: malignum
Officium, siue illa metus conuicia rupit
Seu frustra nimius properat fauor. et tamen illud
190
Ne uanum totas genus aspernere per artis:
Mirum quam celeres et quantum nare merentur,
Tum non est uicti quoi concessere labori.
Idcirco uariis miscebo gentibus usum:
Quondam inconsultis mater dabit Vmbrica Gallis
195
Sensum agilem, traxere animos de patre Gelonae
Hyrcano et uanae tantum Calydonia linguae
Exibit uitium patre emendata Molosso.
Scilicet ex omni florem uirtute capessunt
Et sequitur natura fauens. at te leue si qua
200
Tangit opus pauidosque iuuat compellere dorcas
Aut uersuta sequi leporis uestigia parui,
Petroniost haec fama cani, uolucresque Sycambros
Et pictam macula Vertraham delige *falsa:
Ocior affectu mentis pennaque cucurrit,
205
Sed premit inuentas, non inuentura latentis
Illa feras, quae Petroniis bene gloria constat.
Quod si maturo pressantes gaudia lusu
Dissimulare feras tacitique accedere possent,
Illis omne decus, quod nunc, metagontes, habetis,
210
Constaret: silua sed uirtus irrita damno est.
At uestrum non uile genus, non patria, uulgo
Sparte quos et Creta suos promittit alumnos:
Sed primum celsa lorum ceruice ferentem,
Glympice, te siluis egit Boeotius Hagnon,
215
Hagnon Astylides, Hagnon, quem plurima semper
Gratia per nostros unum testabitur usus.
Hic trepidas artis et uix nouitate sedentes
Vidit qua propior peteret uia nec sibi turbam
Contraxit comitem nec uasa tenentia longe:
220
Vnus praesidium atque operi spes magna petito
Adsumptus metagon lustrat per nota ferarum
Pascua, per fontes, per quas triuere latebras.
Primae lucis opus: tum signa uapore ferino
Intemerata legens si quast qua fallitur eius
225
Turba loci, maiore secat spatia extera gyro;
Atque hic egressu iam tum sine fraude reperto
Incubuit, spatiis qualis permissa Lechaeis
Thessalium quadriga decus, quam gloria patrum
Excitat et primae spes ambitiosa coronae.
230
Sed ne qua ex nimio redeat iactura fauore,
Lex dicta officiis: neu uoce lacesseret hostem
Neue leuem praedam aut propioris pignora lucri
Amplexus primos nequiquam effunderet actus;
Iam uero impensum melior fortuna laborem
235
Cum sequitur iuxtaque domus quaesita ferarum,
Et sciat occultos et signis arguat hostes:
(Aut effecta leui testatur gaudia cauda
Aut ipsa infodiens uncis uestigia plantis
Mandit humum celsisue apprensat naribus auras);
240
Et tamen, ut ne prima fauentem pignora fallant,
Circum omnem aspretis medius qua clauditur orbis
Ferre pedem accessusque abitusque notare ferarum
Admonet et, si forte loco spes prima fefellit,
Rusum opus incubuit spatiis; at, prospera si res,
245
Intacto repetet prima ad uestigia gyro.
Ergo ubi plena suo rediit uictoria fine,
In partem praedae ueniat comes et sua norit
Praemia: sic operi iuuet inseruisse benigne.
Hoc ingens meritumst, haec ultima palma tropaei,
250
Hagnon magne, tibi diuum concessa fauore:
Ergo semper eris, dum carmina dumque manebunt
Siluarum dotes atque arma Diania terris.
Hic et semiferam thoum de sanguine prolem
Finxit. non alio maior sub pectore uirtus,
255
Siue in lora uoces seu nudi ad pignera martis.
Thoes commissos (clarissima fama) leones
Et subiere astu et paruis domuere lacertis;
Nam genus exiguum et pudeat, quam informe, fateri,
Vulpina species: tamen huic exacta uoluntas.
260
At non est alius quem tanta ad munia fetus
Exercere uelis, aut te tua culpa refellet
Inter opus, quom sera cadit prudentia damno.
Iunge pares ergo et maiorum pignore signa
Feturam prodantque tibi metagonta parentes,
265
Qui genuere sua pecus hoc immane iuuenta.
Et primum expertos animi, quae gratia primast,
In uenerem iungam. tum sortis cura secunda,
Ne renuat species aut quem detractet honorem.
Sint celsi uultus, sint hirtae frontibus aures,
270
Os magnum, et patulis agitatos naribus ignes
Spirent, astricti succingant ilia uentres,
Cauda breuis longumque latus discretaque collo
Caesaries neu pexa nimus neu frigoris illa
Impatiens; ualidis tum surgat pectus ab armis,
275
Quod magnos capiat motus magnisque supersit.
Effuge qui lata pandit uestigia planta:
Mollis in officio. siccis ego dura lacertis
Crura uelim et solidos haec in certamina calces.
Sed frustra longus properat labor, abdita si non
280
Altas in latebras unique inclusa marito
Femina: nec patres ueneris sub tempore magnos
Illa neque emeritae seruat fastigia laudis.
Primi complexus, dulcissuma prima uoluptas
(Hunc ueneri dedit impatiens natura furorem),
285
Si tenuit custos et mater adultera non est.
Da requiem grauidae solitosque remitte labores:
Vix oneri super illa suo. tum deinde monebo,
Ne matrem indocilis natorum turba fatiget,
Percensere notis iamque inde excernere prauos.
290
Signa dabunt ipsi. teneris uix artibus haeret
Ille tuos olim non defecturus honores,
Iamque illum impatiens aequae uehementia sortis
Extulit: affectat materna regna sub aluo,
Vbera tota tenet, a tergo liber aperto,
295
Dum tepida indulget terris clementia mundi;
Verum ubi Caurino perstrinxit frigore uesper,
Irreptat turbaque potens operitur inerti.
Illius et manibus uires sit cura futuras
Perpensare: leuis deducet pondere fratres:
300
Nec me pignoribus, nec te mea carmina fallent.
Protinus et cultus alios et debita fetae
Blandimenta feres curaque sequere merentem:
Illa perinde suos, ut erit, de lacte minores
Ad longam praestabit opem. tum denique, fetae
305
Cum desunt operi, fregitque industria matres,
Transeat in catulos omnis tutela relictos.
Lacte nouam pubem facilique tuebere maza,
Nec luxus alios auidaeque impendia uitae
Noscant: haec magno redit indulgentia damno.
310
Nec mirum: humanos non est magis altera sensus,
Tollit ni ratio et uitiis adeuntibus obstat.
Haec illast Pharios quae fregit noxia reges,
Dum seruata cauis potant Mareotica gemmis
Nardiferumque metunt Gangen uitiisque ministrant.
315
Sic et Achaemenio cecidisti, Lydia, Cyro:
Atqui diues eras ac fluminis aurea uenis.
Scilicet ad summam ne quid restaret habendi,
Tu quoque luxuriae fictas dum colligis artes
Et sequeris demens alienam, Graecia, culpam,
320
O quantum et quotiens decoris frustrata paterni!
At qualis nostris, quam simplex mensa Camillis!
Qui tibi cultus erat post tot, Serrane, triumphos!
Ergo illi ex habitu uirtutisque indole priscae
Imposuere orbi Romam caput, actaque ab illis
325
Ad caelum uirtus summosque tetendit honores.
Scilicet exiguis magna sub imagine rebus
Prospicies, quae sit ratio, et quo fine regendae.
Idcirco imperium catulis unusque magister
Additur: ille dapes poenamque operamque *moramque
330
Temperet, hunc spectet siluas domitura iuuentus.
Nec uile arbitrium est: quoicumque haec regna dicantur,
Ille tibi egregia iuuenis de pube legendus,
Vtrumque et prudens et sumptis impiger armis.
Quod nisi et accessus et agendi tempora belli
335
Nouerit et socios tutabitur hoste minores,
Aut cedent aut illa tamen uictoria damno est.
Ergo in opus uigila factusque ades omnibus armis:
(Arma acuere uirum); tegat imas fascia suras
.... is inulina, suis et tergore fuluo
340
I.......canaque e maele galeri,
Ima Toletano praecingant ilia cultro
Terribilemque manu uibrata falarica dextra
Det sonitum et curuae rumpant non peruia falces.
Haec tua militia est. quin et Mauortia bello
345
Vulnera et errantis per tot diuertia morbos
Causasque affectusque canum tua cura tueri est.
Stat Fatum supra totumque auidissimus Orcus
Pascitur et nigris orbem circumsonat alis.
Scilicet ad magnum maior ducenda laborem
350
Cura, nec expertos fallet deus: huic quoque nostrae
Est aliud, quod praestet opus, placabile numen.
Nec longe auxilium, licet alti uulneris orae
Abstiterint atroque cadant cum sanguine fibrae:
Inde rape ex ipso qui uulnus fecerit hoste
355
Virosam eluuiem lacerique per ulceris ora
Sparge manu, uenas dum sucus comprimat acer:
Mortis enim patuere uiae. tum pura monebo
Circum labra sequi tenuique includere filo.
(At si pernicies angusto pascitur ore,
360
Contra pande uiam fallentisque argue causas
Morborum: in uitio facilis medicina reperto)
Sed tacta impositis mulcent p.........
(Id satis) aut nigrae circum picis unguine signant;
Quodsi destricto leuis est in uulnere noxa,
365
Ipse habet auxilium ualidae natale saliuae.
Illa grauis labes et curis altior illis,
Cum uitium causae totis egere latentes
Corporibus seraque aperitur noxia summa.
Inde emissa lues et per contagia morbi
370
Venere in uulgum fusaque exercitus ingens
Aequali sub labe ruit, nec uiribus ullis
Aut merito ueniast aut spes exire precanti.
Quod siue a Stygia letum Proserpina nocte
Extulit et Furiis commissam ulciscitur iram,
375
Seu uitium ex alto spiratque uaporibus aether
Pestiferis, seu terra suos populatur honores:
Fontem auerte mali. trans altas ducere calles
Admoneo latumque fuga superabitis amnem.
Hoc primum effugium leti: tunc ficta ualebunt
380
Auxilia et nostra quidam redit usus ab arte.
Sed uarii motus nec in omnibus una potestas:
Disce uices et quae tutelast proxima tempta.
Pluruma per catulos rabies inuictaque tardis
Praecipitat letale malum: sit tutius ergo
385
Antire auxiliis et primas uincere causas.
Namque subit, nodis qua lingua tenacibus haeret,
(Vermiculum dixere) mala atque incondita pestis.
Ille ubi salsa siti praecepit uiscera longe,
Aestiuos uibrans accensis febribus ignes,
390
Moliturque fugas et sedem spernit amaram.
Scilicet hoc motu stimulisque potentibus acti
In furias uertere canes. ergo insita ferro
Iam teneris elementa mali causasque recidunt.
Nec longa in facto medicinast ulcere: purum
395
Sparge salem et tenui permulce uulnus oliuo:
Ante relata suas quam nox bene compleat umbras,
Ecce aderit factique oblitus uulneris ultro
Blanditur mensis cereremque efflagitat ore.
Quid, priscas artes inuentaque simplicis aeui,
400
Si referam? non illa metus solacia falsi
Tam longam traxere fidem. collaribus ergo
Sunt qui lucifugae cristas inducere maelis
Iussere aut sacris conserta monilia conchis
Et uiuum lapidem et circa Melitensia nectunt
405
Curalia et magicis adiutas cantibus herbas.
Ac sic offectus oculique uenena maligni
Vicit tutela pax impetrata deorum.
At si deformis lacerum dulcedine corpus
Persequitur scabies, longi uia pessima leti:
410
In primo accessu tristis medicina, sed una
Pernicies redimenda anima, quae prima sequaci
Sparsa malost, ne dira trahant contagia uulgus.
Quodsi dat spatium clemens et promonet ortu
Morbus, disce uias et qua sinit artibus exi.
415
Tunc et odorato medicata bitumina uino
Hipponiasque pices neglectaeque unguen amurcae
Miscuit et summam complectitur ignis in unam.
Inde lauant aegros: atque ira coercita morbi
Laxatusque rigor. quae te ne cura timentem
420
Differat, et pluuias et Cauri frigora uitent;
Duc magis, ut nudis incumbunt uallibus aestus,
A uento clarique faces ad solis, ut omne
Exsudent uitium subeatque latentibus ultro
Quae facta est medicina uadis. nec non tamen illum
425
Spumosi catulos mergentem litoris aestu
Respicit et facilis Paean adiuuit in artes.
O rerum prudens quantam experientia uulgo
Materiem largita boni, si uincere curent
Desidiam et gratos agitando prendere finis!
430
Est in Trinacria specus ingens rupe cauique
Introsum reditus, circum atrae moenia siluae
Alta premunt ruptique ambustis faucibus amnes;
Vulcano condicta domus. quam subter eunti
Stagna sedent uenis oleoque madentia uiuo.
435
Huc defecta mala uidi pecuaria tabe
Saepe trahi uictosque malo grauiore magistros.
"Te primum, Vulcane, loci, pacemque precamur,
Incola sancte, tuam: da fessis ultima rebus
Auxilia et, meriti si nulla est noxia tanti,
440
Tot miserare animas liceatque attingere fontis,
Sancte, tuos" ter quisque uocant, ter pinguia libant
Tura foco, struitur ramis felicibus ara.
Hic (dictu mirum atque alias ignobile monstrum)
Aduersis specibus ruptoque e pectore montis
445
Venit ouans Austris et multo flumine flammae
Emicat ipse: manu ramum pallente sacerdos
Termiteum quatiens "procul hinc extorribus ire
Edico praesente deo, praesentibus aris,
Quis scelus aut manibus sumptum aut in pectore motumst"
450
Inclamat: cecidere animi et trepidantia membra.
O quisquis misero fas umquam in supplice fregit,
Quis pretio fratrum meliorisque ausus amici
Sollicitare caput patriosue lacessere diuos,
Illum agat infandae comes huc audacia culpae:
455
Discet commissa quantum deus ultor in ira
Pone sequens ualeat. sed cui bona pectore mens est
Obsequiturque deo, deus illam molliter aram
Lambit et ipse, suos ubi contigit ignis honores,
Defugit a sacris rursumque reconditur antro:
460
Huic fas auxilium et Vulcania tangere dona.
Nec mora, si medias exedit noxia fibras,
His laue praesidiis affectaque corpora mulce:
Regnantem excuties morbum. deus auctor, et ipsa
Artem aluit natura suam. quae robore pestis
465
Acrior aut leto propior uia? sed tamen illi
Hinc uenit auxilium ualida uehementius ira.
Quod primam si fallet opem dimissa facultas,
At tu praecipitem qua spes est proxima labem
Aggredere: in subito subita et medicina tumultu.
470
Stringendae nares et bina ligamina ferro
Armorum, geminaque cruor ducendus ab aure:
Hinc uitium, hinc illa est auidae uehementia pesti.
Ilicet auxiliis fessum solabere corpus
Subsiduasque fraces defusaque Massica prisco
475
Sparge cado: Liber tenuis e pectore curas
Exigit, et morbo Liber medicina furenti.
Quid dicam tussis, quid inertis damna ueterni
Aut incuruatae siquast tutela podagrae?
Mille tenent pestes curaque potentia maior.
480
Mitte age (non opibus tanta est fiducia nostris),
Mitte, anime: ex alto ducendum numen Olympo,
Supplicibusque uocanda sacris tutela deorum.
Idcirco aeriis molimur compita lucis
Spicatasque faces sacrum ad nemorale Dianae
485
Sistimus et solito catuli uelantur honore,
Ipsaque per flores medio in discrimine luci
Strauere arma sacris et pace uacantia festa.
Tum cadus et uiridi fumantia liba feretro
Praeueniunt teneraque extrudens cornua fronte
490
Haedus et ad ramos etiamnum haerentia poma,
Lustralis de more sacri, quo tota iuuentus
Lustraturque deae proque anno reddit honorem.
Ergo impetrato respondet multa fauore
Ad partis, qua poscis opem; seu uincere siluas
495
Seu tibi fatorum labes exire minasque
Cura prior, tua magna fides tutelaque uirgo.
Restat equos finire notis, quos arma Dianae
Admittant: non omne meas genus audet in artis.
Est uitium ex animo, sunt quos imbellia fallant
500
Corpora, praeueniens quondam est incommoda uirtus.
Consule, Penei qualis perfunditur amne
Thessalus aut patriae quem conspexere Mycenae
Glaucum: nempe ingens, nempe ardua fundet in auras
Crura. quis Eleas potior lustrauit harenas?
505
Ne tamen hoc attingat opus: iactantior illi
Virtus quam siluas durumque lacessere martem.
Nec saeuos miratur equos terrena Syene
Scilicet, et Parthis inter sua mollia rura
Mansit honor; ueniat Caudini saxa Taburni
510
Garganumue trucem aut Ligurinas desuper Alpes;
Ante opus excussis cadet unguibus. et tamen illi
Est animus fingetque meas se iussus in artes:
Sed iuxta uitium posuit deus. at tibi contra
Callaecis lustratur equis scruposa Pyrene,
515
Non tamen Hispano martem temptare *ministro
Ausim: muricibus uix ora tenacia ferro
Concedunt. at tota leui Nasamonia *uirga
Fingit equos: ipsis Numidae soluere *capistris
Audax et patiens operum g............
520
Centum actus spatiis atque eluctabitur iram.
Nec magni cultus: sterilis quodcumque remisit
Terra sui tenuesque satis producere riui.
Sic et Strymonio facilis tutela Bisaltae:
Possent Aetnaeas utinam se ferre per arces,
525
Qui ludus Siculis. quid tum, si turpia colla
Aut tenuis dorso curuatur spina? per illos
Cantatus Graiis Acragas uictaeque fragosum
Nebroden liquere ferae: (o quantus in armis
Ille meis quoius dociles pecuaria fetus
530
Sufficient) quis Chaonios contendere contra
Ausit, uix merita quos signat Achaia palma?
Spadices uix Pellaei ualuere Cerauni;
At tibi deuotae magnum pecuaria Cyrrhae,
Phoebe, decus meruere, leuis seu iungere currus
535
Vsus, seu nostras agere in sacraria tensas.
Venanti melius pugnat color: optima nigra
Crura illi badiosque legunt et a........
Et quorum fessas imitantur terga fauillas.
...... tum Italiae (sic di uoluere) parentes
540
.........et terras omni praecepimus usu
...........collustrat prata ..mati......