Ouidius tristia 3, 10

Altre sezioni


Siquis adhuc istic meminit Nasonis adempti,

      Et superest sine me nomen in urbe meum.

Suppositum stellis numquam tangentibus aequor

      Me sciat in media uiuere barbaria.

5

Sauromatae cingunt, fera gens, Bessique Getaeque,

      Quam non ingenio nomina digna meo!

Dum tamen aura tepet, medio defendimur Histro:

      Ille suis liquidis bella repellit aquis.

At cum tristis hiems squalentia protulit ora,

10

      Terraque marmoreo est candida facta gelu,

Dum prohibet Boreas et nix habitare sub Arcto,

      Tum patet has gentes axe tremente premi.

Nix iacet, et iactam ne sol pluuiaeque resoluant,

      Indurat Boreas perpetuamque facit.

15

Ergo ubi delicuit nondum prior, altera uenit,

      Et solet in multis bima manere locis;

Tantaque commoti uis est Aquilonis, ut altas

      Aequet humo turres tectaque rapta ferat.

Pellibus et sutis arcent mala frigora bracis,

20

      Oraque de toto corpore sola patent.

Saepe sonant moti glacie pendente capilli,

      Et nitet inducto candida barba gelu;

Nudaque consistunt, formam seruantia testae,

      Vina, nec hausta meri, sed data frusta bibunt.

25

Quid loquar, ut uincti concrescant frigore riui,

      Deque lacu fragiles effodiantur aquae?

Ipse, papyrifero qui non angustior amne

      Miscetur uasto multa per ora freto,

Caeruleos uentis latices durantibus, Hister

30

      Congelat et tectis in mare serpit aquis;

Quaque rates ierant, pedibus nunc itur, et undas

      Frigore concretas ungula pulsat equi;

Perque nouos pontes, subter labentibus undis,

      Ducunt Sarmatici barbara plaustra boues.

35

Vix equidem credar, sed, cum sint praemia falsi

      Nulla, ratam debet testis habere fidem.

Vidimus ingentem glacie consistere pontum,

      Lubricaque immotas testa premebat aquas.

Nec uidisse sat est. durum calcauimus aequor,

40

      Vndaque non udo sub pede summa fuit.

Si tibi tale fretum quondam, Leandre, fuisset,

      Non foret angustae mors tua crimen aquae.

Tum neque se pandi possunt delphines in auras

      Tollere; conantes dura coercet hiems.

45

Et quamuis Boreas iactatis insonet alis,

      Fluctus in obsesso gurgite nullus erit;

Inclusaeque gelu stabunt in marmore puppes,

      Nec poterit rigidas findere remus aquas.

Vidimus in glacie pisces haerere ligatos,

50

      Sed pars ex illis tum quoque uiua fuit.

Siue igitur nimii Boreae uis saeua marinas,

      Siue redundantes flumine cogit aquas,

Protinus aequato siccis Aquilonibus Histro

      Inuehitur celeri barbarus hostis equo;

55

Hostis equo pollens longeque uolante sagitta

      Vicinam late depopulatur humum.

Diffugiunt alii, nullisque tuentibus agros

      Incustoditae diripiuntur opes,

Ruris opes paruae, pecus et stridentia plaustra,

60

      Et quas diuitias incola pauper habet.

Pars agitur uinctis post tergum capta lacertis,

      Respiciens frustra rura Laremque suum:

Pars cadit hamatis misere confixa sagittis:

      Nam uolucri ferro tinctile uirus inest.

65

Quae nequeunt secum ferre aut abducere, perdunt,

      Et cremat insontes hostica flamma casas.

Tunc quoque, cum pax est, trepidant formidine belli,

      Nec quisquam presso uomere sulcat humum.

Aut uidet aut metuit locus hic, quem non uidet, hostem;

70

      Cessat iners rigido terra relicta situ.

Non hic pampinea dulcis latet uua sub umbra,

      Nec cumulant altos feruida musta lacus.

Poma negat regio, nec haberet Acontius, in quo

      Scriberet hic dominae uerba legenda suae.

75

Aspiceres nudos sine fronde, sine arbore, campos:

      Heu loca felici non adeunda uiro!

Ergo tam late pateat cum maximus orbis,

      Haec est in poenam terra reperta meam.