Candide Liber, ades (sic sit tibi mystica uitis
Semper, sic hedera tempora uincta geras),
Aufer et ipse merum, Pater, et medicare dolorem:
Saepe tuo cecidit munere uictus amor.
5
Care puer, madeant generoso pocula Baccho,
Et nobis prona funde Falerna manu.
Ite procul, durum curae genus, ite labores:
Fulserit hic niueis Delius alitibus.
Vos modo proposito dulces faueatis amici,
10
Neue neget quisquam me duce se comitem
Aut, si quis uini certamen mite recuset,
Fallat eum tecto cara puella dolo.
Ille facit dites animos deus, ille ferocem
Contudit et dominae misit in arbitrium
15
Armeniasque tigres et fuluas ille leaenas
Vicit et indomitis mollia corda dedit.
Haec Amor et maiora ualet; sed poscite Bacchi
Munera: quem uestrum pocula sicca iuuant?
Conuenit ex aequo nec toruus Liber in illos
20
Qui se quique una uina iocosa colunt:
At uenit iratus nimium nimiumque seueris:
Qui timet irati numina magna, bibat.
Quales his poenas qualis quantusque minetur,
Cadmeae matris praeda cruenta docet.
25
Sed procul a nobis hic sit timor, illaque, siqua est,
Quid ualeat laesi sentiat ira dei.
Quid precor a demens? uenti temeraria uota
Aeriae et nubes diripienda ferant.
Quamuis nulla mei superest tibi cura, Neaera,
30
Sis felix, et sint candida fata tua.
At nos securae reddamus tempora mensae:
Venit post nimbos una serena dies.
Ei mihi, difficile est imitari gaudia falsa,
Difficile est tristi fingere mente iocum,
35
Nec bene mendaci risus componitur ore,
Nec bene sollicitis ebria uerba sonant.
Quid queror infelix? turpes discedite curae:
Odit Lenaeus tristia uerba pater.
Gnosia, Theseae quondam periuria linguae
40
Fleuisti ignoto sola relicta mari:
Sic cecinit pro te doctus, Minoi, Catullus
Ingrati referens impia facta uiri.
Vos ego nunc moneo: felix, quicumque dolore
Alterius disces posse cauere tuo.
45
Nec uos aut capiant pendentia bracchia collo
Aut fallat blanda sordida lingua prece.
Etsi perque suos fallax iurauit ocellos
Iunonemque suam perque suam Venerem,
Nulla fides inerit: periuria ridet amantum
50
Iuppiter et uentos irrita ferre iubet.
Ergo quid totiens fallacis uerba puellae
Conqueror? ite a me, seria uerba, procul.
Quam uellem tecum longas requiescere noctes
Et tecum longos peruigilare dies,
55
Perfida nec merito nobis nec amica merenti,
Perfida, sed, quamuis perfida, cara tamen!
Naida Bacchus amat: cessas, o lente minister?
Temperet annosum Marcia lympha merum.
Non ego, si fugiat nostrae conuiuia mensae
60
Ignotum cupiens uana puella torum,
Sollicitus repetam tota suspiria nocte.
I, puer, et liquidum fortius adde merum.
Iam dudum Syrio madefactus tempora nardo
Debueram sertis implicuisse comas.