Tibullus *elegiae 3, 19

Altre sezioni


Nulla tuum nobis subducet femina lectum:

      Hoc primum iuncta est foedere nostra Venus.

Tu mihi sola places, nec iam te praeter in urbe

      Formosa est oculis ulla puella meis.

5

Atque utinam possis uni mihi bella uideri,

      Displiceas aliis: sic ego tutus ero.

Nil opus inuidia est, procul absit gloria uulgi:

      Qui sapit, in tacito gaudeat ipse sinu.

Sic ego secretis possum bene uiuere siluis,

10

      Qua nulla humano sit uia trita pede.

Tu mihi curarum requies, tu nocte uel atra

      Lumen, et in solis tu mihi turba locis.

Nunc licet e caelo mittatur amica Tibullo,

      Mittetur frustra, deficietque Venus.

15

Per tibi sancta tuae Iunonis numina iuro,

      Quae sola ante alios est mihi magna deos.

Quid facio demens? heu heu, mea pignora cedo.

      Iuraui stulte: proderat iste timor.

Nunc tu fortis eris, nunc tu me audacius ures:

20

      Hoc peperit misero garrula lingua malum.

Iam, facias quodcumque uoles, tuus usque manebo,

      Nec fugiam notae seruitium dominae,

Sed Veneris sanctae considam uinctus ad aras:

      Haec notat iniustos supplicibusque fauet.