Tibullus *elegiae 3, 12

Altre sezioni


Natalis Iuno, sanctos cape turis aceruos,

      Quos tibi dat tenera docta puella manu.

Lota tibi est hodie, tibi se laetissima compsit,

      Staret ut ante tuos conspicienda focos.

5

Illa quidem ornandi causas tibi, diua, relegat:

      Est tamen, occulte cui placuisse uelit.

At tu, sancta, faue, neu quis diuellat amantes,

      Sed iuueni quaeso mutua uincla para.

Sic bene compones: ulli non ille puellae

10

      Seruire aut cuiquam dignior illa uiro.

Nec possit cupidos uigilans deprendere custos

      Fallendique uias mille ministret Amor.

Annue purpureaque ueni perlucida palla:

      Ter tibi fit libo, ter, dea casta, mero.

15

Praecipiat natae mater studiosa, quid optet:

      Illa aliud tacita, iam tua, mente rogat.

Vritur, ut celeres urunt altaria flammae,

      Nec, liceat quamuis, sana fuisse uelit.

Sis iuueni grata, ut, ueniet cum proximus annus,

20

      Hic idem uotis iam uetus extet amor.