Tibullus *elegiae 3, 11

Altre sezioni


Qui mihi te, Cerinthe, dies dedit, hic mihi sanctus

      Atque inter festos semper habendus erit.

Te nascente nouum Parcae cecinere puellis

      Seruitium et dederunt regna superba tibi.

5

Vror ego ante alias: iuuat hoc, Cerinthe, quod uror,

      Si tibi de nobis mutuus ignis adest.

Mutuus adsit amor per te, dulcissima furta,

      Perque tuos oculos per Geniumque rogo.

Magne Geni, cape tura libens uotisque faueto,

10

      Si modo, cum de me cogitat, ille calet.

Quodsi forte alios iam nunc suspirat amores,

      Tunc precor infidos, sancte, relinque focos.

Nec tu sis iniusta, Venus: uel seruiat aeque

      Vinctus uterque tibi, uel mea uincla leua.

15

Sed potius ualida teneamur uterque catena,

      Nulla queat posthac quam soluisse dies.

Optat idem iuuenis quod nos, sed tectius optat:

      Nam pudet haec illum dicere uerba palam.

At tu, Natalis, quoniam deus omnia sentis,

20

      Annue: quid refert, clamne palamne roget?