Sulpicia est tibi culta tuis, Mars magne, kalendis:
Spectatum e caelo, si sapis, ipse ueni.
Hoc Venus ignoscet: at tu, uiolente, caueto
Ne tibi miranti turpiter arma cadant.
5
Illius ex oculis, cum uult exurere diuos,
Accendit geminas lampadas acer Amor.
Illam, quicquid agit, quoquo uestigia mouit,
Componit furtim subsequiturque Decor.
Seu soluit crines, fusis decet esse capillis:
10
Seu compsit, comptis est ueneranda comis.
Vrit, seu Tyria uoluit procedere palla:
Vrit, seu niuea candida ueste uenit.
Talis in aetherio felix Vertumnus Olympo
Mille habet ornatus, mille decenter habet.
15
Sola puellarum digna est cui mollia caris
Vellera det sucis bis madefacta Tyros,
Possideatque, metit quicquid bene olentibus aruis
Cultor odoratae diues Arabs segetis
Et quascumque niger Rubro de litore gemmas
20
Proximus Eois colligit Indus aquis.
Hanc uos, Pierides, festis cantate kalendis,
Et testudinea Phoebe superbe lyra:
Hoc sollemne sacrum multos consummet in annos:
Dignior est uestro nulla puella choro.