Hunc cecinere diem Parcae fatalia nentes

      Stamina, non ulli dissoluenda deo;

Hunc fore, Aquitanas posset qui fundere gentes,

      Quem tremeret forti milite uictus Atax.

5

Euenere: nouos pubes Romana triumphos

      Vidit et euinctos bracchia capta duces:

At te uictrices laurus, Messalla, gerentem

      Portabit niueis currus eburnus equis.

Non sine me est tibi partus honos: Tarbella Pyrene

10

      Testis et Oceani litora Santonici,

Testis Atur Rhodanusque celer magnusque Garunna,

      Carnuti et flaui caerula lympha Liger.

An te, Cydne, canam, tractis qui leniter undis

      Caeruleus placidis per uada serpis aquis,

15

Quantus et aethereo contingens uertice nubes

      Frigidus intonsos Taurus alat Cilicas?

Quid? referam, ut uolitet crebras intacta per urbes

      Alba Palaestino sancta columba Syro,

Vtque maris uastum prospectet turribus aequor

20

      Prima ratem uentis credere docta Tyros,

Qualis et, arentes cum findit Sirius agros,

      Fertilis aestiua Nilus abundet aqua?

Nile pater, quanam possum te dicere causa

      Aut quibus in terris occuluisse caput?

25

Te propter nullos tellus tua postulat imbres,

      Arida nec Pluuio supplicat herba Ioui.

Te canit atque suum pubes miratur Osirim

      Barbara, Memphiten plangere docta bouem.

Primus aratra manu sollerti fecit Osiris

30

      Et teneram ferro sollicitauit humum,

Primus inexpertae commisit semina terrae

      Pomaque non notis legit ab arboribus.

Hic docuit teneram palis adiungere uitem,

      Hic uiridem dura caedere falce comam:

35

Illi iucundos primum matura sapores

      Expressa incultis uua dedit pedibus.

Ille liquor docuit uoces inflectere cantu,

      Mouit et ad certos nescia membra modos,

Bacchus et agricolae magno confecta labore

40

      Pectora tristitiae dissoluenda dedit.

Bacchus et afflictis requiem mortalibus affert,

      Crura licet dura compede pulsa sonent.

Non tibi sunt tristes curae nec luctus, Osiri,

      Sed chorus et cantus et leuis aptus amor,

45

Sed uarii flores et frons redimita corymbis,

      Fusa sed ad teneros lutea palla pedes

Et Tyriae uestes et dulcis tibia cantu

      Et leuis occultis conscia cista sacris.

Huc ades et Genium ludo centumque choreis

50

      Concelebra et multo tempora funde mero:

Illius et nitido stillent unguenta capillo,

      Et capite et collo mollia serta gerat.

Sic uenias hodierne: tibi dem turis honores,

      Liba et Mopsopio dulcia melle feram.

55

At tibi succrescat proles, quae facta parentis

      Augeat et circa stet ueneranda senem.

Nec taceat monumenta uiae, quem Tuscula tellus

      Candidaque antiquo detinet Alba Lare.

Namque opibus congesta tuis hic glarea dura

60

      Sternitur, hic apta iungitur arte silex.

Te canet agricola, a magna cum uenerit urbe

      Serus inoffensum rettuleritque pedem.

At tu, Natalis multos celebrande per annos,

      Candidior semper candidiorque ueni.