Propertius elegiae 3, 4

Altre sezioni


Arma deus Caesar dites meditatur ad Indos,

      Et freta gemmiferi findere classe maris.

Magna, uiri, merces! parat ultima terra triumphos;

      Tigris et Euphrates sub tua iura fluent;

5

Sera, sed Ausoniis ueniet prouincia uirgis;

      Assuescent Latio Partha tropaea Ioui.

Ite agite, expertae bello date lintea prorae

      Et solitum, armigeri, ducite munus equi!

Omina fausta cano: Crassos clademque piate!

10

      Ite et Romanae consulite historiae!

Mars pater et sacrae fatalia lumina Vestae,

      Ante meos obitus sit precor illa dies,

Qua uideam, spoliis onerato Caesaris axe,

      Ad uulgi plausus saepe resistere equos,

15

Inque sinu carae nixus spectare puellae

      Incipiam et titulis oppida capta legam,

Tela fugacis equi et bracati militis arcus

      Et subter captos arma sedere duces!

Ipsa tuam serua prolem, Venus: hoc sit in aeuum,

20

      Cernis ab Aenea quod superesse caput.

Praeda sit haec illis, quorum meruere labores:

      Me sat erit Sacra plaudere posse Via.