Visus eram molli recubans Heliconis in umbra,
Bellerophontei qua fluit umor equi,
Reges, Alba, tuos et regum facta tuorum,
Tantum operis, neruis hiscere posse meis,
5
Paruaque tam Magnis admoram fontibus ora,
Vnde pater sitiens Ennius ante bibit,
Et cecinit Curios fratres et Horatia pila,
Regiaque Aemilia uecta tropaea rate,
Victricesque moras Fabii pugnamque sinistram
10
Cannensem et uersos ad pia uota deos,
Hannibalemque Lares Romana sede fugantis,
Anseris et tutum uoce fuisse Iouem:
Cum me Castalia speculans ex arbore Phoebus
Sic ait aurata nixus ad antra lyra:
15
"Quid tibi cum tali, demens, est flumine? quis te
Carminis heroi tangere iussit opus?
Non hic ulla tibi speranda est fama, Properti:
Mollia sunt paruis prata terenda rotis;
Vt tuus in scamno iactetur saepe libellus,
20
Quem legat exspectans sola puella uirum.
Cur tua praescriptos euecta est pagina gyros?
Non est ingenii cumba grauanda tui.
Alter remus aquas alter tibi radat harenas,
Tutus eris: medio maxima turba mari est."
25
Dixerat, et plectro sedem mihi monstrat eburno,
Quo noua muscoso semita facta solo est.
Hic erat affixis uiridis spelunca lapillis,
Pendebantque cauis tympana pumicibus,
Orgia Musarum et Sileni patris imago
30
Fictilis et calami, Pan Tegeaee, tui;
Et Veneris dominae uolucres, mea turba, columbae
Tingunt Gorgoneo punica rostra lacu;
Diuerseque nouem sortitae iura Puellae
Exercent teneras in sua dona manus:
35
Haec hederas legit in thyrsos, haec carmina neruis
Aptat, at illa manu texit utraque rosam.
E quarum numero me contigit una dearum
(Vt reor a facie, Calliopea fuit):
"Contentus niueis semper uectabere cycnis,
40
Nec te fortis equi ducet ad arma sonus.
Nil tibi sit rauco praeconia classica cornu
Flare, nec Aonium tingere Marte nemus;
Aut quibus in campis Mariano proelia signo
Stent et Teutonicas Roma refringat opes,
45
Barbarus aut Sueuo perfusus sanguine Rhenus
Saucia maerenti corpora uectet aqua.
Quippe coronatos alienum ad limen amantis
Nocturnaeque canes ebria signa fugae,
Vt per te clausas sciat excantare puellas,
50
Qui uolet austeros arte ferire uiros."
Talia Calliope, lymphisque a fonte petitis
Ora Philitea nostra rigauit aqua.