Qui uidet, is peccat: qui te non uiderit, ergo

     Non cupiet: facti lumina crimen habent.

Nam quid Praenestis dubias, o Cynthia, sortis,

     Quid petis Aeaei moenia Telegoni?

5

Aut cur te Herculeum deportant esseda Tibur?

     Appia cur totiens te uia Lanuuium?

Hoc utinam spatiere loco, quodcumque uacabis,

     Cynthia! Sed tibi me credere turba uetat,

Cum uidet accensis deuotam currere taedis

10

      In nemus et Triuiae lumina ferre deae.

Scilicet umbrosis sordet Pompeia columnis

      Porticus, aulaeis nobilis Attalicis,

Et platanis creber pariter surgentibus ordo,

      Flumina sopito quaeque Marone cadunt,

15

Et, leuiter nymphis toto crepitantibus orbe,

     Cum subito Triton ore refundit aquam.

Falleris, ista tui furtum uia monstrat amoris:

      Non urbem, demens, lumina nostra fugis!

Nil agis, insidias in me componis inanis,

20

      Tendis iners docto retia nota mihi.

Sed de me minus est: famae iactura pudicae

     Tanta tibi miserae, quanta meretur, erit.

Nuper enim de te nostras peruenit ad auris

      Rumor, et in tota non bonus urbe fuit.

25

Sed tu non debes inimicae cedere linguae:

     Semper formosis fabula poena fuit.

Non tua deprenso damnata est fama ueneno:

      Testis eris puras, Phoebe, uidere manus.

Sin autem longo nox una aut altera lusu

30

     Consumpta est, non me crimina parua mouent.

Tyndaris externo patriam mutauit amore,

      Et sine decreto uiua reducta domum est.

Ipsa Venus fertur corrupta libidine Martis,

     Nec minus in caelo semper honesta fuit.

35

Quamuis Ida deam pastorem dicat amasse,

      Atque inter pecudes accubuisse deam,

Hoc et Hamadryadum spectauit turba sororum

      Silenique senes et pater ipse chori,

Cum quibus Idaeo legisti poma sub antro,

40

     Supposita excipiens, Nai, caduca manu.

An quisquam in tanto stuprorum examine quaerit

      "Cur haec tam diues? Quis dedit? Vnde dedit?"

O nimium nostro felicem tempore Romam,

      Si contra mores una puella facit!

45

Haec eadem ante illam impune et Lesbia fecit:

      Quae sequitur, certe est inuidiosa minus.

Qui quaerit Tatios ueteres durosque Sabinos,

      Hic posuit nostra nuper in urbe pedem.

Tu prius et fluctus poteris siccare marinos,

50

      Altaque mortali deligere astra manu,

Quam facere ut nostrae nolint peccare puellae:

     Hic mos Saturno regna tenente fuit.

At cum Deucalionis aquae fluxere per orbem,

     Et post antiquas Deucalionis aquas,

55

Dic mihi, quis potuit lectum seruare pudicum,

      Quae dea cum solo uiuere sola deo?

Vxorem quondam magni Minois, ut aiunt,

      Corrupit torui candida forma bouis;

Nec minus aerato Danae circumdata muro

60

      Non potuit magno casta negare Ioui.

Quod si tu Graias, si tu es imitata Latinas,

      Semper uiue meo libera iudicio!