Nempe incomposito dixi pede currere uersus
Lucili. quis tam Lucili fautor inepte est,
Vt non hoc fateatur? at idem, quod sale multo
Vrbem defricuit, charta laudatur eadem.
5
Nec tamen hoc tribuens dederim quoque cetera; nam sic
Et Laberi mimos ut pulchra poemata mirer.
Ergo non satis est risu diducere rictum
Auditoris; et est quaedam tamen hic quoque uirtus.
Est breuitate opus, ut currat sententia neu se
10
Inpediat uerbis lassas onerantibus auris,
Et sermone opus est modo tristi, saepe iocoso,
Defendente uicem modo rhetoris atque poetae,
Interdum urbani, parcentis uiribus atque
Extenuantis eas consulto. ridiculum acri
15
Fortius et melius magnas plerumque secat res.
Illi, scripta quibus comoedia prisca uiris est,
Hoc stabant, hoc sunt imitandi; quos neque pulcher
Hermogenes umquam legit neque simius iste
Nil praeter Caluum et doctus cantare Catullum.
20
"At magnum fecit, quod uerbis graeca latinis
Miscuit." o seri studiorum quine putetis
Difficile et mirum, Rhodio quod Pitholeonti
Contigit? "at sermo lingua concinnus utraque
Suauior, ut Chio nota si conmixta Falerni est."
25
Cum uersus facias, te ipsum percontor, an et cum
Dura tibi peragenda rei sit causa Petilli?
Scilicet oblitus patriaeque patrisque Latini,
Cum Pedius causas exsudet Publicola atque
Coruinus, patriis intermiscere petita
30
Verba foris malis, Canusini more bilinguis.
Atque ego cum graecos facerem, natus mare citra,
Versiculos, uetuit me tali uoce Quirinus
Post mediam noctem uisus, cum somnia uera:
"In siluam non ligna feras insanius ac si
35
Magnas Graecorum malis implere cateruas."
Turgidus Alpinus iugulat dum Memnona dumque
Diffingit Rheni luteum caput, haec ego ludo,
Quae neque in aede sonent certantia iudice Tarpa
Nec redeant iterum atque iterum spectanda theatris.
40
Arguta meretrice potes Dauoque Chremeta
Eludente senem comis garrire libellos
Vnus uiuorum, Fundani; Pollio regum
Facta canit pede ter percusso; forte epos acer
Vt nemo Varius ducit, molle atque facetum
45
Vergilio annuerunt gaudentes rure Camenae:
Hoc erat, experto frustra Varrone Atacino
Atque quibusdam aliis, melius quod scribere possem,
Inuentore minor; neque ego illi detrahere ausim
Haerentem capiti cum multa laude coronam.
50
At dixi fluere hunc lutulentum, saepe ferentem
Plura quidem tollenda relinquendis. age quaeso,
Tu nihil in magno doctus reprehendis Homero?
Nil comis tragici mutat Lucilius Acci?
Non ridet uersus Enni grauitate minores,
55
Cum de se loquitur non ut maiore reprensis?
Quid uetat et nosmet Lucili scripta legentis
Quaerere, num illius, num rerum dura negarit
Versiculos natura magis factos et euntis
Mollius ac siquis pedibus quid claudere senis,
60
Hoc tantum contentus, amet scripsisse ducentos
Ante cibum uersus, totidem cenatus, Etrusci
Quale fuit Cassi rapido feruentius amni
Ingenium, capsis quem fama est esse librisque
Ambustum propriis. fuerit Lucilius, inquam,
65
Comis et urbanus, fuerit limatior idem
Quam rudis et Graecis intacti carminis auctor
Quamque poetarum seniorum turba; sed ille,
Si foret hoc nostrum fato delapsus in aeuum,
Detereret sibi multa, recideret omne quod ultra
70
Perfectum traheretur, et in uersu faciendo
Saepe caput scaberet uiuos et roderet unguis.
Saepe stilum uertas, iterum quae digna legi sint
Scripturus, neque te ut miretur turba labores,
Contentus paucis lectoribus. an tua demens
75
Vilibus in ludis dictari carmina malis?
Non ego; nam satis est equitem mihi plaudere, ut audax,
Contemptis aliis, explosa Arbuscula dixit.
Men moueat cimex Pantilius aut cruciet quod
Vellicet absentem Demetrius aut quod ineptus
80
Fannius Hermogenis laedat conuiua Tigelli?
Plotius et Varius, Maecenas Vergiliusque,
Valgius et probet haec Octauius optimus atque
Fuscus et haec utinam Viscorum laudet uterque
Ambitione relegata. te dicere possum,
85
Pollio, te, Messalla, tuo cum fratre, simulque
Vos, Bibule et Serui, simul his te, candide Furni,
Conpluris alios, doctos ego quos et amicos
Prudens praetereo, quibus haec, sint qualiacumque,
Adridere uelim, doliturus, si placeant spe
90
Deterius nostra. Demetri, teque, Tigelli,
Discipularum inter iubeo plorare cathedras.
I, puer, atque meo citus haec subscribe libello.