Iam ueris comites, quae mare temperant,
Inpellunt animae lintea Thraciae,
Iam nec prata rigent nec fluuii strepunt
Hiberna niue turgidi.
5
Nidum ponit Ityn flebiliter gemens
Infelix auis et Cecropiae domus
Aeternum opprobrium, quod male barbaras
Regum est ulta libidines.
Dicunt in tenero gramine pinguium
10
Custodes ouium carmina fistula
Delectantque deum, cui pecus et nigri
Colles Arcadiae placent.
Adduxere sitim tempora, Vergili.
Sed pressum Calibus ducere Liberum
15
Si gestis, iuuenum nobilium cliens,
Nardo uina merebere.
Nardi paruus onyx eliciet cadum,
Qui nunc Sulpiciis accubat horreis,
Spes donare nouas largus amaraque
20
Curarum eluere efficax.
Ad quae si properas gaudia, cum tua
Velox merce ueni: non ego te meis
Inmunem meditor tinguere poculis,
Plena diues ut in domo.
25
Verum pone moras et studium lucri
Nigrorumque memor, dum licet, ignium
Misce stultitiam consiliis breuem:
Dulce est desipere in loco.