Non uides, quanto moueas periclo,
Pyrrhe, Gaetulae catulos leaenae?
Dura post paulo fugies inaudax
Proelia raptor,
5
Cum per obstantis iuuenum cateruas
Ibit insignem repetens Nearchum,
Grande certamen, tibi praeda cedat,
Maior an illa.
Interim, dum tu celeris sagittas
10
Promis, haec dentis acuit timendos,
Arbiter pugnae posuisse nudo
Sub pede palmam
Fertur et leni recreare uento
Sparsum odoratis umerum capillis,
15
Qualis aut Nireus fuit aut aquosa
Raptus ab Ida.