Faune, Nympharum fugientum amator,
Per meos finis et aprica rura
Lenis incedas abeasque paruis
Aequus alumnis,
5
Si tener pleno cadit haedus anno
Larga nec desunt Veneris sodali
Vina creterrae, uetus ara multo
Fumat odore.
Ludit herboso pecus omne campo,
10
Cum tibi nonae redeunt Decembres;
Festus in pratis uacat otioso
Cum boue pagus;
Inter audacis lupus errat agnos,
Spargit agrestis tibi silua frondes,
15
Gaudet inuisam pepulisse fossor
Ter pede terram.