Horatius carmina 3, 14

Testo base di riferimento: F. Klingner, 1959

Cura dell'edizione digitale: G. C. Musa, 2009

Altre sezioni


Herculis ritu modo dictus, o plebs,

Morte uenalem petiisse laurum

Caesar Hispana repetit penatis

Victor ab ora.

5

Vnico gaudens mulier marito

Prodeat iustis operata sacris

Et soror clari ducis et decorae

Supplice uitta

Virginum matres iuuenumque nuper

10

Sospitum; uos, o pueri et puellae

Iam uirum expertae, male nominatis

Parcite uerbis.

Hic dies uere mihi festus atras

Exiget curas: ego nec tumultum

15

Nec mori per uim metuam tenente

Caesare terras.

I pete unguentum, puer, et coronas

Et cadum Marsi memorem duelli,

Spartacum siqua potuit uagantem

20

Fallere testa.

Dic et argutae properet Neaerae

Murreum nodo cohibere crinem:

Si per inuisum mora ianitorem

Fiet - abito.

25

Lenit albescens animos capillus

Litium et rixae cupidos proteruae:

Non ego hoc ferrem calidus iuuenta

Consule Planco.

6

sacris A B λ l π φ Bentley

diuis E R δ φ ψ π P Σ