Martiis caelebs quid agam kalendis,
Quid uelint flores et acerra turis
Plena miraris positusque carbo in
Caespite uiuo,
5
Docte sermones utriusque linguae:
Voueram dulcis epulas et album
Libero caprum prope funeratus
Arboris ictu.
Hic dies anno redeunte festus
10
Corticem adstrictum pice dimouebit
Amphorae fumum bibere institutae
Consule Tullo.
Sume, Maecenas, cyathos amici
Sospitis centum et uigiles lucernas
15
Perfer in lucem: procul omnis esto
Clamor et ira.
Mitte ciuilis super urbe curas:
Occidit Daci Cotisonis agmen,
Medus infestus sibi luctuosis
20
Dissidet armis,
Seruit Hispanae uetus hostis orae
Cantaber sera domitus catena,
Iam Scythae laxo meditantur arcu
Cedere campis.
25
Neglegens, ne qua populus laboret,
Parce priuatus nimium cauere et
Dona praesentis cape laetus horae:
Linque seuera.