Cur me querelis exanimas tuis?
Nec dis amicum est nec mihi te prius
Obire, Maecenas, mearum
Grande decus columenque rerum.
5
A, te meae si partem animae rapit
Maturior uis, quid moror altera,
Nec carus aeque nec superstes
Integer? ille dies utramque
Ducet ruinam. non ego perfidum
10
Dixi sacramentum: ibimus, ibimus,
Vtcumque praecedes, supremum
Carpere iter comites parati.
Me nec Chimaerae spiritus igneae
Nec si resurgat centimanus Gyges
15
Diuellet umquam: sic potenti
Iustitiae placitumque Parcis.
Seu Libra seu me Scorpios adspicit
Formidolosus pars uiolentior
Natalis horae seu tyrannus
20
Hesperiae Capricornus undae,
Vtrumque nostrum incredibili modo
Consentit astrum: te Iouis inpio
Tutela Saturno refulgens
Eripuit uolucrisque Fati
25
Tardauit alas, cum populus frequens
Laetum theatris ter crepuit sonum:
Me truncus inlapsus cerebro
Sustulerat, nisi Faunus ictum
Dextra leuasset, Mercurialium
30
Custos uirorum. reddere uictimas
Aedemque uotiuam memento:
Nos humilem feriemus agnam.