Non semper imbres nubibus hispidos
Manant in agros aut mare Caspium
Vexant inaequales procellae
Vsque nec Armeniis in oris,
5
Amice Valgi, stat glacies iners
Mensis per omnis aut Aquilonibus
Querqueta Gargani laborant
Et foliis uiduantur orni:
Tu semper urges flebilibus modis
10
Mysten ademptum nec tibi uespero
Nec rapidum fugiente solem.
At non ter aeuo functus amabilem
Plorauit omnis Antilochum senex
15
Annos nec inpubem parentes
Troilon aut Phrygiae sorores
Fleuere semper. desine mollium
Tandem querellarum et potius noua
Cantemus Augusti tropaea
20
Caesaris et rigidum Niphaten,
Medumque flumen gentibus additum
Victis minores uoluere uertices
Intraque praescriptum Gelonos
Exiguis equitare campis.