Nondum subacta ferre iugum ualet
Ceruice, nondum munia conparis
Aequare nec tauri ruentis
In uenerem tolerare pondus.
5
Circa uirentis est animus tuae
Campos iuuencae, nunc fluuiis grauem
Solantis aestum, nunc in udo
Ludere cum uitulis salicto
Praegestientis. tolle cupidinem
10
Inmitis uuae: iam tibi liuidos
Distinguet autumnus racemos
Purpureo uarius colore.
Iam te sequetur: currit enim ferox
Aetas et illi quos tibi dempserit
15
Adponet annos; iam proterua
Fronte petet Lalage maritum,
Dilecta, quantum non Pholoe fugax,
Non Chloris albo sic umero nitens
Vt pura nocturno renidet
20
Luna mari Cnidiusue Gyges,
Quem si puellarum insereres choro,
Mire sagacis falleret hospites
Discrimen obscurum solutis
Crinibus ambiguoque uoltu.
13
iam te sequetur Ξ (Sappho I, 21 L.-P.)
iam te sequitur Q Ψ